Fyrri undanúrslitaleikurinn í deildarbikarnum – Carabao bikarnum – fer fram á morgun þegar United tekur á móti Manchester City. Það hefðu líklega bæði lið kosið að mæta Aston Villa eða jafnvel Leicester frekar en að þurfa að spila tvo leiki við erkióvin en það verður ekki á allt kosið.
Árið hefur byrjað illa hjá United og leikurinn á morgun verður enn ein þolraunin og það verður fróðlegt að sjá hvernig liðið verður. Solskjær sparaði leikmenn gegn Wolves um helgina og það hlýtur að þýða að hann ætli að leggja meira í leikinn á morgun, ekki þarf hann að hvíla menn fyrir leikinn gegn Norwich um helgina.
Martial og Lingard verða hugsanlega með eftir veikindi helgarinnar en það verður ekki metið fyrr en á morgun. Harry Maguire meiddist gegn Wolves og er vafi hvort hann verður með. Það væri gaman að sjá Axel Tuanzebe stíga upp eftir meiðsli en það hlýtur að vera ólíklegt hann byrji.
Spáum liðinu svona
Pep Guardiola átti auðveldan leik gegn Port Vale í bikarnum og hvíldi menn. Það eru engin meiðsli og fyrir utan að Claudio Bravo sér um að standa í marki í bikarleikjum verður þetta þeirra sterkasta lið
það var afrek að vinna City á Etihad, en það eru örugglega ekki mörg okkar bjartsýn á að Fred og Nemanja Matić verði miðjan sem geri Manchester City skráveifu á morgun.
Leikurinn hefst kl 20:00
Skildu eftir svar