United tekur á móti Leicester City á Old Trafford klukkan 14:00 á morgun, sunnudaginn 19. febrúar. Eftir fín úrslit í miðri viku á Nývangi mun United taka á móti refunum frá Leicester á heimavelli á konudaginn sjálfan. Leicester hefur verið í brasi á þessari leiktíð og oft hefur því verið velt upp hvort Brendan Rodgers sé kominn með liðið á endastöð. Liðið situr nú í 14 sæti ensku úrvalsdeildarinnar og miðað við undanfarin tímabil telja sig eiga meira inni. Liðið hefur þó aðeins rétt úr kútnum eftir vonda byrjun á tímabilinu og virðast hafa komið aðeins ferskari inn í nýtt ár. Leicester hefur unnið síðustu tvo síðustu leiki í úrvalsdeildinni og síðustu helgi gjörsamlega valtaði liðið yfir Tottenham.
United hefur verið í stífu leikjaprógrammi undanfarna mánuði og það er spurning hvort þetta leikjaálag fari að segja eitthvað til sín, þar sem Ten Hag breytir ekkert sérstaklega mikið um byrjunarlið. Það virðist þó ekkert ætla að stöðva Marcus Rahsford en hann hélt uppteknum hætti gegn Barcelona í miðri viku og skoraði eitt og lagði upp annað (þó það væri sjálfsmark). Martinez fékk hvíld í miðri viku þar sem hann var í banni sem og Marcel Sabitzer. Þá mun Casemiro missa af leiknum þar sem þetta er síðasti leikur hans í leikbanni eftir hálstakið í leiknum gegn Crystal Palace.
Liðsspá
Ég tel að Ten Hag breyti ekki miklu frá leiknum gegn Barca nema leikmenn í banni og leikmenn að koma úr bönnum munu svissa á byrjunarliðssætum og sætum upp í stúku. Það er gríðarlega mikilvægt fyrir United að vinna þennan leik og halda í við City og Arsenal sem og losa sig frá Newcastle og pakkanum í evrópudeildar- og sambandsdeildarsætunum.
Skildu eftir svar