Það má færa rök fyrir því að leikmenn Manchester United hafi verið í jólaskapi í kvöld en þeir svo gott sem gáfu Leicester City stig. Lokatölur 2-2 í leik sem United hefði átt að vinna örugglega. Eftir nokkra leiki í röð þar sem sóknarleikur United hefur ekki verið upp á marga fiska þá var liðið mjög sprækt í kvöld, í raun það sprækt að það hefði eins og áður sagði átt að vinna þennan leik nokkuð örugglega.
Antonio Valencia og Matteo Darmian eru báðir meiddir og ákvað José Mourinho því að nota Victor Lindelöf í hægri bakverði en byrjunarliðið var eftirfarandi:
Varamenn: Romero, Rojo, Shaw, Herrera, Mkhitaryan, Ibrahimovic, Rashford.
Leicester City styrkti upp sókndjörfu byrjunarliði en Riyad Mahrez, Marc Albrighton, Demarai Gray og Jamie Vardy byrjuðu allir leikinn.
Leikurinn
Leikurinn var nokkuð fjörugur til að byrja með en United sóttu stíft án þess þó að skapa sér nein alvöru marktækifæri. Það var því töluvert gegn gangi leiksins sem Jamie Vardy kom heimamönnum yfir á 27. mínútu.
Varnarlega voru United hreinlega í molum í allri atburðarás þessa marks en United virtist vera með nánast allt sitt lið eins ofarlega á vellinum og mögulegt er – gegn einu bestu skyndisóknarliði í deildinni. Á meðan var David De Gea límdur á línunni.
United missir boltann í vítateig Leicester – boltinn berst á Jamie Vardy sem togar Phil Jones með sér á miðjan vallarhelming Leicester, Vardy tékkar svo knöttinn til baka á Onyinye Ndidi sem þrumar honum í fyrsta góða 60+ metra upp vellinn þar sem Riyad Mahrez stingur sér af hægri vængnum og er allt í einu einn á Chris Smalling. Ashley Young, sem var samsíða Mahrez þegar sendingin kom, er hvergi sjáanlegur í þessari atburðarás. Smalling tekst að hægja á Mahrez sem bíður bara eftir að Vardy, sem var á skokkinu þangað til hann setur allt í einu í 5. gír og þýtur upp völlinn, kemur aðsvífandi. Vardy fær svo einfalda sendingu frá Mahrez og leggur knöttinn snyrtilega í netið en De Gea var að mínu mati alltof lengi að koma út á móti Vardy (sem og að koma út í boltann sem Mahrez fékk yfir toppinn).
Svo er það Phil Jones í öllu þessu en eftir að hafa elt Vardy upp á vallarhelming Leicester þá skokkaði hann rólega til baka í stað þess að taka á rás og koma sér í stöðu ef svo skyldi verða að Vardy færi af stað. Það var svo ekki fyrr en Vardy var búinn að setja í gír að Jones áttaði sig á þessu en þá var það orðið of seint og Big Game Vardy skoraði enn og aftur.
Jamie Vardy scores his 50th PL goal, 21 of which have come against the ‘Big Six’ of Liverpool (6), Arsenal (5), Man City (3), Man Utd (3), Chelsea (2) & Spurs (2) pic.twitter.com/kMzK2ZTmhC
— Sky Sports Statto (@SkySportsStatto) December 23, 2017
Eftir markið voru United frekar óöryggir í aðgerðum sínum en hægt og rólega náður þeir aftur tökum á leiknum. Það var svo Juan Mata sem jafnaði eftir góðan undirbúning Jesse Lingard á 40. mínútu. Lingard lagði boltann snyrtilega í fyrsta á Mata eftir sendingu Anthony Martial. Mata sýndi svo fádæma gæði þegar hann lagði knöttinn snyrtilega í hægra hornið en Kasper Schmeichel var varnarlaus í markinu. Staðan því orðin 1-1 og þannig var hún í hálfleik.
#mufc pic.twitter.com/IZKOWB6Lj9
— mufcgif (@mufcgif) December 23, 2017
Í síðari hálfleik tóku United öll völd á vellinum og óðu hreinlega í færum. Heimamenn fengu þó fyrsta alvöru færi síðari hálfleiks þegar Victor Lindelöf bjargaði á línu. Strax í kjölfarið fékk Martial svo algjört dauðafæri sem í 9 af hverjum 10 skiptum endar í netinu. Romelu Lukaku átti þá frábæra sendingu inn fyrir á Martial sem tók við knettinum og ætlaði að leggja hann með hægri fæti í hægra hornið en boltinn skoppaði aðeins of hátt fyrir Martial sem sendi hann rakleiðis upp í stúku. Mjög lífleg byrjun á síðari hálfleik sem átti eftir að vera frábær skemmtun.
Þegar klukkutími var liðinn braut Harry Maguire á Martial rétt fyrir utan vítateig. Mata stillti knettinum upp og smellti honum svo fallega yfir veginn og í netið. Það má setja spurningamerki við Schmeichel í markinu en við kvörtuðum ekki. Mata kominn með tvö mörk í einum og sama leiknum í fyrsta skipti síðan hann skoraði tvennu gegn Liverpool á Anfield árið 2015.
MATAAA 2-1 #mufc pic.twitter.com/LcVQAoeo8v
— mufcgif (@mufcgif) December 23, 2017
United fékk svo gullin tækifæri til að klára leikinn 12 mínútum síðar. Lukaku átti aftur frábæra sendingu sem hefði átt að skila marki en að þessu sinni var það Jesse Lingard (af öllum mönnum) sem klúðraði. Hann var kominn framhjá Schmeichel en tókst á einhvern ótrúlegan hátt að setja knöttinn í stöngina. Aðeins mínútu eftir það voru heimamenn orðnir 10 en Daniel Amartey, sem kom inn á fyrir Danny Simpson, fékk tvö gul spjöld á fjögurra mínútna kafla og þar með rautt.
Hvort Jon Moss hafi verið með samviskubit er óvíst en hann dæmdi allavega ekki vítaspyrnu þegar Schmeichel virtist brjóta á Marcus Rashford sem var sloppinn einn í gegn. Manni fannst samt sem áður Rashford hefði átt að nýta færið betur og hreinlega skora áður en það kom til þess að Schmeichel braut á honum en Rashford átti slæma innkomu í dag.
Rashford’s decision making has been awful recently…could’ve played the ball to Lukaku today and against Bristol City to finish the game off#MUFC pic.twitter.com/KLryDhKyy5
— Manchester United (@MUFCScoop) December 23, 2017
Það var þó ekki að sjá að Leicester væru manni færri síðustu mínútur leiksins en þeir tóku öll völd á vellinum. United gekk skelfilega að halda í knöttinn og tókst hreinlega ekki að drepa leikinn. Á þessum tímapunkti fékk maður það á tilfinninguna að þetta væri einn af þessum dögum. Til að bæta gráu ofan á svart þá tognaði Smalling í nára og var haltrandi um völlinn og það nýtti Leicester sér.
Albrighton hafði fengið nóg pláss til að dæla fyrirgjöfum inn í teiginn þegar langt var komið fram í uppbótartíma en það virtist enginn United maður hafa áhuga á að pressa hann. Eftir að hafa sett eina á kollinn á Jones þá setti hann eina á fjærstöngina þegar leikurinn var að fjara út. Þar var Smalling að reyna dekka Harry Maguire en það tókst ekki betur en svo að Maguire stakk sér á bakvið hann og lúðraði knettinum í netið. Staðan orðin 2-2 og Moss flautaði af um leið og United tók miðju.
Grátleg niðurstaða í leik sem United hefði með öllu átt að vinna en maður setur stóra spurningu við skipulagið síðustu mínúturnar. Auðvitað átti Lindelöf að koma inn í hafsentinn fyrst Smalling var á annarri löppinni og Smalling hefði bara geta farið fram eða hreinlega útaf. Á Twitter gengur sá orðrómur að Ander Herrera hafi neitað að detta niður í hægri bakvörðinn en það verður að viðurkennast að maður trúir því varla.
Allavega, lokatölur 2-2 í leik sem var stórskemmtilegur en hörmuleg færanýting og skipulagsleysi undir lok leiks kostaði liðið á endanum tvö stig sem er grátlegt þar sem United hefði geta náð fimm stiga forskoti á Chelsea og níu stiga forskoti á Liverpool.
Næsti leikur Manchester United er á annan í jólum en þá kemur Burnley í heimsókn.