Ritstjórn Rauðu djöflanna tók á dögunum upp 20. þáttinn af podkastinu.
Manchester United heimsótti Shrewsbury Town í kvöld. Í húfi var áframhaldandi þáttaka í ensku bikarkeppninni. Heimaliðið hafði án efa fylgst með United gegn Midtjylland í Europa League. Leikplanið var að hlaða mönnum fyrir markið og vona það besta.
United byrjaði leikinn af miklum krafti og það var augljóst að það átti að klára leikinn snemma og taka engan sjens á replay enda hópurinn þunn skipaður þessa dagana.
Memphis kallinn var greinilega með leyfi til að skjóta og reyna að búa eitthvað til. Oftar en ekki enduðu tilraunir hans uppi í stúku. En hann hefði reyndar með smá heppni getað nælt sér í stoðsendingu og mark úr aukaspyrnu ef ekki hefði verið fyrir Martial sem að blokkaði glæsilega.
En fyrsta markið kom frá engum öðrum en Chris Smalling sem hafði hangið frammi eftir hornspyrnu. Smalling fékk sendingu inn fyrir og kláraði eins og varnarmaður.
Juan Mata hefur verið oft gagnrýndur fyrir að nýta ekki færin sín. Hann lét það ekki trufla sig og skoraði laglegt mark úr aukaspyrnu í uppbótartíma. Reyndar var alveg spurning um rangstöðu nokkra United manna sem trufluðu markmann Shrewsbury.
Staðan þegar flautað var til leikhlés var Shrewsbury Town 0:2 Manchester United.
Louis van Gaal gerði eina skiptingu í hálfleik en Joe Riley leysti Cameron Borthwick-Jackson af hólmi en sá síðarnefndi hafði meiðst í fyrri hálfleik.
En svo var það bara business as usual í seinni hálfleik United greinilega að leita að þriðja markinu. Heimamenn fóru aðeins meira að sækja í seinni hálfleiknum og vissu sem var að þeir höfðu engu að tapa en allt að vinna.
Jesse Lingard skoraði sitt fimmta mark á tímabilinu á 61. mínútu. Ander Herrera átti stoðsendinguna eftir snarpa sókn gestanna sem hófst með löngu kasti frá Romero í markinu.
Van Gaal gerði tvær aðrar skiptingar í hálfleiknum. Andreas Pereira kom inn fyrir Mata og Will Keane fyrir Martial. Kean greyið átti eitt gott færi í stöng en meiddist svo í kjölfarið og þurfti svo að fara af velli aðeins örfáum mínútum eftir að koma inná. United því leikmanni færri sem eftir lifði leiks.
Þrátt fyrir að reyna náði Shrewsbury aldrei að stríða gestunum að neinu ráði því of mikill klassamunur var á liðunum og 0:3 sigur því staðreynd.
Maður leiksins að mínu mati var Jesse Lingard.
Manchester United mun mæta West Ham í næstu umferð.