Til að byrja með vill ritstjórn votta Rio Ferdinand og fjölskyldu alla sína samúð en Rebecca Ellison, eiginkona hans, lést í nótt eftir stutta baráttu við krabbamein. Á 5. mínútu leiksins klöppuðu stuðningsmenn liðsins og sungu nafn hennar. Gífurlega vel gert hjá stuðningsmönnum liðsins. Einnig spiluðu leikmenn með svört sorgarbönd.
En að leiknum, Van Gaal stillti upp þessu liði gegn lærisveinum Tony Pulis.
Manchester United
Bekkur: Valdes, Blackett, Jones, Di Maria (’64, Blind), Januzaj, Pereira, Falcao (83, McNair).
West Brom
Myhill, Dawson, McAuley, Olsson, Lescott, Brunt, Yacob, Gardner, Mulumbu, Fletcher, Berahino.
Leikskýrslan
Leikurinn byrjaði mjög rólega og ekkert markvert sem gerðist fyrstu mínútur leiksins. Eftir 10 mínútur hafði í raun hvorugt lið átt skot á markið en W.B.A menn litu virkuðu þó skeinuhættari en okkar menn.
Það má segja að leikurinn hafi lifnað við á 12. mínútu en þá kom fyrsta hálf færið hjá Manchester United. Juan Mata og Ander Herrera unnu vel saman á miðjunni þar sem endaði með að Herrera setti mjög flottan bolta á Ashley Young úti á vinstri vængnum. Young kom inn á völlinn og flaug fram hjá einum, ef ekki tveimur varnarmönnum og átti skot sem fór af varnarmanni í Robin Van Persie og þaðan aftur fyrir endamörk. Upp úr því fóru W.B.A í sókn sem endaði með því að þeir fengu horn þar sem Jolean Lescott fékk svo gott sem frían skalla sem betur fer fór beint í hendurnar á David De Gea. Hornið kom eftir að okkar menn lentu í basli með pressuna frá W.B.A og De Gea endaði á að setja boltann í innkast. Eftir að hafa hreinsað hornspyrnuna fóru United menn í sókn sem endaði með því að boltinn endaði hjá Van Persie sem átti fyrsta skot United á markið. Boaz Myhill í marki W.B.A varði boltann út í teginn og Ashley Young skaut í varnarmann og þaðan í horn. Úr horninu endaði svo boltinn aftur hjá Van Persie sem átti slakt skot sem Myhill varði.
Þessi borðtennisleikur hélt svo áfram og fékk W.B.A annað hálf færi þegar Mulumbu átti skalla sem De Gea varði. Stuttu eftir það fékk Van Persie svo fínt skotfæri eftir lága fyrirgjöf frá Young en hann skaut framhjá. Hættulegustu sóknir liðsins komu af vinstri vængnum á þessum tíma leiks. Eftir þetta róaðist leikurinn aðeins, United var þó nálægt því að skora rosalega fallegt mark á 25 mínútu þegar Wayne Rooney átti unaðslega utanfótar snuddu í átt að Juan Mata en boltinn var skallaður beint fyrir fætur Van Persie, á vítateigslínunni, en hann náði ekki skoti á markið þar sem varnarmaður W.B.A tæklaði boltann í burtu. Leikurinn róaðist talsvert þarna og hætti að minna á borðtennisleik.
United fékk svo tvö horn með skömmu millibili á 32 mínútu en það kom ekkert úr þeim. Það sem eftir lifði hálfleiks þá gerðist bókstaflega ekki neitt fyrir utan fyrirgjafar-skot frá Antonio Valencia vini mínum sem Myhill varði út í teiginn og Ander Herrera tók sína bestu Karate Kid tilraun en skaut yfir.
Hálfleikstölur 0-0
W.B.A byrjuðu síðari hálfleikinn betur og fengu horn strax á 46. mínútu sem endaði sem betur fer í höndunum á De Gea. Stuttu síðar átti Wayne Rooney fínt langskot sem Myhill átti þó í litlum vandræðum með.
Það virðist sem Van Gaal hafi breytt aðeins til í hálfleik en í byrjun síðari hálfleiks var Fellaini að spila sem fremsti maður með Rooney og Van Persie þar rétt fyrir aftan. Ástæðan gæti verið sú að Van Persie var ekki alveg að ná að standa sig gegn fjögurra hafsenta línu W.B.A. Hann átti þó ágætis skot f löngu færi á 54. mínútu en sóknarleikur United var mjög brösugur í byrjun síðari hálfleiks, og í raun út leikinn. Á 59. mínútu mátti sjá tilgang Fellaini upp á topp en þá fékk hann boltann og lagði hann til baka á Herrera sem átti slakt skot framhjá. Tveimur mínútum síðar braut Paddy McNair á Darren nokkrum Fletcher rétt fyrir utan vítateig og fékk fyrir vikið gult spjald. Upp úr aukaspyrnunni lúðraði Chris Brunt boltanum í afturendann á Jonas Olson og það fór boltinn í netið. 0-1 fyrir West Brom. Strax í kjölfarið kom fyrsta skiptingin; Angel Di Maria kom inn á fyrir Daley Blind.
Á 72. mínútu gerðist ótrúlegur hlutur. Eftir að hafa sleppt tveimur frekar augljósum vítum þá fékk Manchester United vítaspyrnu eftir að Saido Berahino fékk fyrirgjöf Valencia í hendina. Robin Van Persie fór á punktinn og ákvað að auka sjálfstraust Boaz Myhill aðeins og setti lausa spyrnu í það horn sem hann var löngu búinn að ákveða að fara í. Staðan því ennþá 0-1. Örskömmu seinna fékk United aukaspyrnu rétt fyrir utan teig og Van Persie skaut á markið og Myhill varði.
Þessi leikur angaði allan tímann af leikjum eins og þeir voru hérna fyrr í vetur. Wayne Rooney á miðjunni, lítið um opin færi, gífurlegt magn af misheppnuðum sendingum, mikið um possession sem gerði ekki nokkurn hlut og hitt liðið skorar á auðvitað á einhvern ótrúlegan hátt. Það var svo sannarlega málið í dag og 0-1 lokatölur. Þriðji leikurinn í röð þar sem United skorar ekki, núna hefur ekki liðið skorað síðan það skoraði fjögur mörk gegn City. Einnig er þetta þriðji leikurinn í röð þar sem United tekst ekki að vinna W.B.A. Hrein og bein skelfing. Það er eins og við höfum farið í tímavél, þessi frammistaða var nánast alveg eisn og slökustu frammistöðurnar fyrir áramót.
Svo gæti ég líklega skrifað heila bók um hvað ég skildi ekki þegar kom að taktík í leiknum en að spila Fellaini sem fremsta manni á meðan Rooney og Van Persie voru inn á skildi ég ekki. Að taka Blind útaf sem hefði geta leyst miðjuna og færa Young í bakvörð skildi ég heldur ekki.
Núna eru þrír leikir eftir af deildinni og United VERÐUR að vinna tvo af þeim ef þeir ætla ekki að hleypa Liverpool í þetta fjórða sæti. Það þýðir einfaldlega ekki annað en að girða sig almennilega og rífa sig í gang.
Maður leiksins; Boaz Myhill
Þrátt fyrir allan þennan pirring sem myndaðist við að horfa á þennan ömurlega fótboltaleik þá fellur það algjörlega í skuggann af þeim fréttum sem komu í morgun. Þetta var aðeins einn fótboltaleikur, sama hversu illa gengur þá maður ekki gleyma því að þetta er aðeins fótbolti. Ég vona að menn verði fljótir að jafna sig. Góðar stundir.
Kv. RTÞ