Rauðu djöflarnir

Enska úrvalsdeildin

Byrjunarliðið gegn Everton

skrifaði þann | Engin ummæli

Jæja, fyrsti leikur tímabilsins, gegn Everton, að fara í gang eftir rúman klukkutíma og liðið er auðvitað klárt. Kíkjum á:

De Gea

Valencia Carrick Vidic Evra

Scholes Cleverley

Nani Kagawa Welbeck

Rooney

Stærstu fréttirnar eru þær að Ferguson velur Welbeck framyfir Van Persie. Það ætti kannski ekki að koma svo mikið á óvart, það er ekki óvenjulegt að glænýir menn byrji á bekknum. Hinsvegar, þegar við erum að tala um menn af þeirri stærðargráðu sem Van Persie er þá bjóst maður nú við því að sjá hann frammi með Rooney. Eins og flestir vita er varnarlínan hjá okkur frekar lömuð þessa dagana þannig að Valencia er í hægri bakverði og Carrick frontar svo vörnina með Vidic (sem er frábært að sjá aftur í liðinu!). Þar sem Carrick er dottinn í vörn þá falla Shcoles og Cleverley aðeins aftar á völlinn, og síðan eru Nani, Kagawa og Welbeck þar sem við könnumst við þá.

Þetta verður erfiður leikur. Við munum vel eftir rimmu liðanna á Old Trafford í vor, sú reyndist afskaplega afdrifarík en það má segja að Man Utd hafi tapað titlinum þann daginn. Ég er hinsvegar bjartsýnn á þennan leik, það þýðir ekkert annað!

Koma svo drengir!

Leikmenn

Alexander Büttner á leiðinni til Manchester United

skrifaði þann | Engin ummæli

Alexander Buttner í leik með Vitesse. © EPA

Öllum að óvörum dúkkuðu allt í upp fréttir í gær frá Hollandi að United væri við það að kaupa 23ja ára gamlan leikmann frá Vitesse Arnhem. Enn hefur ekkert heyrst frá United um málið en svo virðist sem fréttirnar hafi verið staðfestar af bæði Büttner og Vitesse. Óhætt er að segja að alla hafi rekið í rogastans, bæði þau okkar sem ekkert þekkja til pilts og hinna líka, viðbrögðin frá Hollandi virðast flestöll á þann veg að hann sé alls ekki af United klassa. Büttner virtist á leið til Southampton fyrr í sumar en ágreiningur um greiðslur til þriðja aðila stöðvuðu það. Nú hafa United og Sir Alex ekki talað fallega um umboðsmenn og slíkar greiðslur, en það er alla vega ekki að stöðva þetta núna.

Büttner var í úrtakshóp Hollands fyrir EM, en unglingurinn Jetro Willems frá Ajax var tekinn framfyrir. Í viðtali við Büttner frá 2010 kemur fram að hann sé alinn upp í fátæku hjólhýsahverfi og fótboltinn á götunni hafi hert hann þannig að hann ætti alveg að geta varist vel. Fram hefur komið að hann þyki líka frekar framsækinn.

En aftur komum við að því að í Hollandi þykir sem þessi leikmaður eigi frekar heima í Southampton en Manchester United. Kaupverð ku vera 3,9m punda og af þessu öllu er ljóst að þarna er verið að kaupa ódýra lausn á hugsanlegum vanda ef Evra lendir í meiðslum, án þess að vera að eyða pening í menn á borð við Leighton Baines. Unglingastarfið mun vonandi gefa af sér framtíðarlausn í þessa stöðu, Tyler Blackett er efnilegur vinstri bakvörður og þarf ekki að hafa áhyggjur að þessi kaup loki á framtiðarmöguleika hans.

Ágæt tímabundin lausn ef af verður.

Leikmenn Staðfest

Robin van Persie til Manchester United (staðfest)

skrifaði þann | Engin ummæli

Robin van Persie og Alex Ferguson

Í fyrsta skipti síðan Rio Ferdinand kom til liðsins 2002 kaupir United leikmann sem á án nokkurs vafa að smella beint inn í hópinn. Þegar Berbatov kom voru fyrir Tevez, Rooney og Ronaldo og Dimi kom inn í baráttu um stöður. Það er hins vegar deginum ljósara að Robin van Persie mun spila hvenær sem hann er heill.

Það þarf ekki að ræða það í löngu máli að í nokkur ár hafa flestir stuðningsmenn verið sammála um að það vanti sterkan jaxl á miðjuna, en hvað sem tautar og raular er Sir Alex ekki sammála því og þess vegna þýðir lítið að vera að ræða hvaða menn við vildum frekar sjá en Van Persie.

Þess vegna horfum við bara núna á kaupin og hugsum okkur gott til glóðarinnar. Van Persie var lang besti leikmaður deildarinnar á síðasta tímabili, eitraður markaskorari úr öllum hugsanlegum færum og mun setja skerpu í sóknina. Eftir góða byrjun í fyrra haust vorum við oft frekar bitlausir, sér í lagi í Meistaradeildinni og það er augljóst að það á ekki eftir að gerast aftur.

Á móti kemur að við vitum lítið um hvað er sterkasta lið okkar í dag, frekar en fyrri daginn. Þó að sumir vilji að Rooney og Van Persie geti ekki spilað sama, til þess séu þeir of líkir leikmenn, þá hafa þeir báðir í gegnum tíðina spilað víða á vellinum. Rooney var á tíðum kominn aftast á miðjuna á síðasta tímabili og Van Persie spilaði fyrir aftan Adebayor á sínum tíma. Þeir eiga því ekki að eiga í neinum vandræðum að aðlagast því að spila saman.

Fyrir aftan þá í biðröðinni eru í raun þrír leikmenn. Shinji Kagawa á þá eðlilegustu stöðu að spila fyrir aftan senter og ég yrði ekki hissa að sjá þá stöðu í leikjum í vetur að Kagawa væri fyrir aftan Van Persie og Rooney úti á kanti þar sem við höfum oft séð hann. Danny Welbeck er að tryggja sig inn sem aðalframherja enska landsliðsins og ég verð fyrir miklum vonbrigðum ef hann lítur ekki á þetta sem áskorun. Hann á eftir að spila í vetur og verðskuldar alla þá leiki sem hann fær. Loks að vini okkar allra, Javier Hernandez. Síðustu daga hefur alls konar orðrómur sprottið upp um hann, að hann hafi farið fram á sölu, eða sé á leiðinni til Arsenal. Það verður erfitt að halda öllum góðum og eftir erfitt tímabil síðast þegar meiðsli voru að hrjá hann er líklegt að hann sé aftast í þessari framherjabiðröð. Þó að sagt sé að topp lið þurfi fjóra toppframherja verður erfitt að halda öllum ánægðum. Mitt mat er þó að ef einhver þarf að vera númer fjögur er ekki hægt að biðja um betri mann til að sætta sig við fjórða sætið og gera samt alltaf sitt besta en Chicharito. Nema ef vera skyldi Ole Gunnar Solskjær.

Eitt af því sem þessi samkeppni gerir er að nú er í fyrsta skipti komin upp sú staða að Wayne Rooney á ekki skilyrðislaust sæti í liðinu. Ég býst hiklaust við að hann haldi því en ef sú staða kemur upp að hann þurfi smá hvíld þurfum við ekki að hafa neinar áhyggjur af því. Við vitum að það hafa komið tímabil þar sem Rooney hefur ekki verið í 100% standi og nú er það ekki vandamál. Að sama skapi hefur álagið við að vera númer 1 hjá Arsenal ekki hjálpað Van Persie í meiðslamálum. Ef hann meiðist eitthvað næstu fjögur árin, verður ekki um það að ræað að hann þurfi að koma of snemma til baka án nægrar endurhæfingar

Robin stóð sig vel í viðtali við MUTV áðan, sagði alla réttu hlutina og á eftir að eiga frábæra innkomu í liðið. Það er ekki nokkur vafi á því og við ljúkum þessu með hans eigin orðum. „Let’s do this“

Fjármál Leikmenn Pistlar Slúður

Shinji Kagawa: Kjarakaup eða eina sem við höfum efni á?

skrifaði þann | 1 ummæli

Shinji Kagawa
Shinji Kagawa er nýjasti meðlimur Man Utd.

Flestir United stuðningsmenn hafa væntanlega einhvern pata af því að fjármál United eru ekki eins frjálsleg og margir myndu vilja. Nú, ef þú hefur ekki heyrt af því máttu bóka að við eigum eftir að skrifa eitthvað um það á næstunni.

Í þessari viku virðist vera frágengið að Eden Hazard sápuóperan er á enda, hann mun ganga til liðs við Chelsea. Kaupin eiga að kosta Chelsea 35 m. punda, 6 milljónir fara til umba Hazards og launin 180-200 þúsund pund á viku. Til fimm ára er þetta samtals pakki upp á 75 milljónir.

Þessa sömu viku eru samningar að nást milli United og Borussia Dortmund um að Shinji Kagawa ( 香川 真司 ) gangi til liðs við United fyrir kaupverð upp á 12,5 milljónir punda með árangursbundnum aukagreiðslum sem gætu hækkað verðið í 17,5 milljónir. Óljóst er með laun, en sögur segja að Kagawa sé með 20þúsund á viku hjá Dortmund og talan 40 þúsund nefnd fyrir vikulaun hjá United.

Skv. fréttum var Hazard búinn að samþykkja kjör hjá United og eins voru Lille og United ásátt um kaupverð þannig að svo virðist sem United hafi í fyrsta skipti frá 30. ágúst 2008 samþykkt útlát yfir 30 milljónum punda.

Í staðinn erum við að fá mann sem kostar rúmlega þriðjung hins, og laun sem eru brotabrot. Er United endanlega farið að versla á útsölum?

Eins og pistlar framtíðar munu vonandi sýna verð ég síðasti maður til að verja Glazera og innkaupastefnu United síðustu þrjú ár, þvert á móti.

Á hinn bóginn tel ég að kaupin á Kagawa ef af verða einhver þau glúrnustu sem hægt er að gera sem stendur. Allt bendir til að við séum að fá toppspilara sem mun koma með kraft og hraða fremst á miðjuna, jútúb myndbönd svo langt sem þau ná sýna mann sem er bæði nokkuð skotviss en um leið alltaf viljugur að gefa á samherja til að skapa betra færi. Verðið sem við erum að borga er mun lægra en ella því pilturinn er á síðasta ári samnings og vill ólmur koma til Englands, og sérstaklega til United.

Þeir sem benda síðan á að hann muni eflaust selja nokkrar treyjur í Japan hafa eflaust rétt fyrir sér. En að ætla að það sé eitthvað annað en bónus í pakkanum held ég sé vitleysa. Allt bendir til að við séum að fá fínan spilara. Þótt hann sé ef til vill ekki alveg jafn frábær og Eden Hazard mun hann nær örugglega bæta lið United.

Ég ætla því hiklaust að vona að frá þessu verði gengið sem fyrst og flokka þetta undir kjarakaup.

Hvort við munum eyða meira í sumar, það er önnur saga og annar pistill.