Manchester United byrjar 2017 á heimsókn til West Ham United í Lundúnum. West Ham leikur nú á nýjum velli, hefur sagt skilið við Upton Park, sem þeir kvöddu einmitt með leik gegn United í vor. Nú er leikið á Ólympíuleikvanginum í London og sýnist víst sitt hverjum um þann völl og stemminguna. Hamrarnir hafa átt misjöfnu gengi að fagna í vetur en það var aðeins í lok nóvember sem liðin mættust tvisvar með skömmu millibili. Náði West Ham í stig á Old Trafford en töpuðu svo 4-1 í Deildarbikarnum aðeins nokkrum dögum síðar. Vonandi verður okkar United í sama gír og þá þegar liðin mætast á morgun.
Mótherjinn
West Ham hefur verið á fínu róli undanfarið. Eftir að tapa 5-1 fyrir Arsenal á heimavelli þá náði liðið jafntefli gegn Liverpool ásamt því að vinna Burnley, Hull City og Swansea City. Lokaleik síðasta árs töpuðu þeir samt gegn Leicester City, 1-0 á útivelli.
Hamrarnir koma vængbrotnir inn í leikinn á morgun en á meiðslalistanum eru Mark Noble, Diafra Sakho, Simone Zaza, James Collins, Arthur Masuaku, Gokhan Töre, Arvalo Arbeloa, Reece Oxford og Sam Byram.
Manchester United
Okkar menn hafa ekki tapað knattspyrnuleik síðan þann 3. nóvember í Tyrklandi. Síðan þá hafa þeir gert þrjú jafntefli og unnið níu, þar af sex í röð.
Síðasti sigurleikur er mönnum eflaust í fersku minni en eftir að lenda undir þá fengum við að sjá eitt gamalt og gott United comeback. Kominn tími til. Fyrir þann leik ákvaðð José Mourinho að hvíla fimm leikmenn svo það má búast við einhverjum breytingum á morgun.
Ég ætla nú ekki að spá of mikið í byrjunarliðið en mig grunar að við munum sjá Marcos Rojo og Phil Jones aftur í hafsent sem og Michael Carrick kemur aftur inná miðjuna. Hvað varðar restina af liðinu þá verður eflaust einhver af fremstu mönnum liðsins hvíldur en ferskar lappir eftir erfiðan leik gegn Middlesboro eru nauðsyn.
Ætla ég að gerast svo djarfur að spá því að United vinni erfiðan 2-1 sigur þar sem Anthony Martial heldur áfram frá því sem var horfið gegn Boro.
Leikurinn er klukkan 17:30 á morgun.
Skildu eftir svar