Í kvöld mætti Manchester United d-deildarliðinu Colchester United í Carabao bikarnum (deildarbikarnum). Litla liðið úr austurhluta landsins var sýnd veiði en ekki gefin en þeim hafði hingað til tekist að leggja bæði Crystal Palace og Tottenham af velli í keppninni.
Á bekknum voru þeir Grant, Garner, Lingard, Jones, Chong, Williams og McTominay,
Lið gestanna var skipað þeim Gerken, Jackson, Tom Eastman, Prosser, Bramall, Lapslie, Pell, Comley, Harriot, Nouble og Norris.
Bekkurinn: Stevenson, Poku, Sowunmi, Gambin, Ross, Clampin og Brown.
Rashford var líflegur fyrstu mínúturnar, vildi fá víti strax á fyrstu mínútu og krækti svo í aukaspyrnu út við teighornið á þeirri þriðju. Þremur mínútum síðar fiskaði hann aukaspyrnu úr enn betri stöðu og tókst að koma föstu skoti á rammann en markvörður gestanna reyndi að grípa boltann en missti hann frá sér en náði þó að endurheimta boltann áður en Greenwood náði til hans.
Fyrsta korterið bar það með sér að leikurinn yrði ansi þungur fyrir gestina í Colchester en heimamenn þjörmuðu verulega að þeim og áttu þeir í stökustu vandræðum að tengja saman sendingar og flestar snertingar þeirra voru hreinsanir.
Sergio Romero virtist hálf einmana á sínum vallarhelming og hefði allt eins getað gert skattaskýrsluna sína á meðan United var 82% með boltann fyrsta korterið.
United átti frábæra sókn sem byrjaði á hægri vængnum en færðist yfir á þann vinstri til Luke Shaw sem fann Juan Mata út við teigshornið. Sá spænski renndi boltanum í hlaup fyrir Marcus Rashford sem bar boltann upp að endalínunni og setti boltann fyrir markið þar sem Dean Gerken kastaði sér fyrir boltann og bjargaði eflaust marki.
Rashford fór svo sjálfur illa með dauðafæri þegar Matic stakk boltanum inn fyrir vörnina og Rashford var réttstæður en fyrsta snerting sveik hann og Gerken snöggur út og náði til boltans. Það er kannski til marks um það hve aftarlega og djúpt Colchester lágu að Harry Maguire bar boltann alla leið upp völlinn að vítateignum og lét vaða.
Aftur skaut Rashford sér inn fyrir þegar Andreas Pereira vippaði tuðrunni yfir vörnina en aftur brást honum bogalistin. Þó verður líka að hrósa varnarlínu Colchester en þeir voru vel á verði og létu ekki undan auðveldlega.
Hálfleiknum lauk með ágætisskoti frá Anthony Martial sem sveif rétt yfir markvinkilinn. Colchester menn líklegast ánægðir með stöðuna enda hafði United ekki fengið mörg færi og þau færi sem liðið fékk runnu út í sandinn.
Síðari hálfleikur fór ágætlega af stað þar sem United reyndi að brjóta á bak aftur baráttuglaða Colchester menn en fyrsta hættulega færið féll gestunum í skaut þegar bakvörðurinn þeirra stakk Maguire af en skot hans var mjög slappt.
Romero handsamaði knöttinn, rúllaði honum út á Matic sem átti stórkostlega sendingu í autt svæðið á vinstri vængnum þar sem bakvörður gestanna var var enn frammi. Rashford var þar á auðum sjó, rakti boltann inn í teig þar sem hann fór þvert í gegnum teiginn og hamraði boltann í þaknetið, óverjandi fyrir Grenken.
Eftir að hafa lent undir neyddust gestirnir til að færa sig ofar á völlinn og reyna hvað þeir gátu að jafna leikana. En engu að síður reyndu þeir að vera þéttir aftur en gæði United voru fljót að sýna sig aftur.
Greenwood fékk frábæra sendingu út á hægri kantinn, leit upp og þrumaði boltanum fyrir markið þar sem Rashford þurfti varla annað en að horfa á boltann til að hann endaði í netinu. Reyndar þurftu hann ekkert að gera þar sem boltinn fór af varnarmanni og í netið. Virkilega vel gert og staðan orðin þægileg og í takti við gang leiksins.
United hélt áfram að bæta í ef eitthvað var og þegar klukkustund var liðin var liðið búið að þrýsta nær öllum varnarmönnum gestanna í boxið með laglegu stuttu spili þar sem nánast hver einasti leikmaður United kom við boltann.
Sókninni lauk með sendingu á Rashford inn fyrir nokkuð þéttan pakka í vítateignum en honum tókst að koma boltanum fyrir markið þar sem Martial skoraði líklegast auðveldasta markið sitt á tímabilinu. 3-0 og heimamenn litu mjög vel út í aðdragandanum að markinu.
Þetta var það síðasta sem Rashford gerði í leiknum en hann ásamt Luke Shaw fóru útaf á meðan Brandon Williams og Jesse Lingard komu inn á í þeirra stað.
Alex Tuanzebe fór fljótlega útaf eftir að hann stoppaði sókn Colchester manna og virtist hafa fengið högg en í hann stað kom James Garner inn á og Matic virtist færast niður í miðvörðinn samhliða skiptingunni.
Nokkur hálffæri litu dagsins ljós eftir skiptingarnar en Colchester menn héldu vörninni þéttri og stoppuðu skotin. Williams, Martial, Mata og Greenwood áttu allir nokkur skot en svo virtist sem staðan væri í rauninni ráðin. Leikurinn varð rólegri þar til á um 84. mínútu eftir lengstu sókn gestanna.
Þá var röðin komin að Maguire sem átti þrususkalla en Grenken blakaði honum yfir markið. United menn voru greinilega ekki saddir og sóttu það sem eftir lifði leiks. Hins vegar lauk leiknum með 3-0 sigri heimamanna, þægilegt og öruggt og í alla staði góður leikur þar sem ungir leikmenn fengu tækifæri, lykilleikmenn fengu að hvílast og undanúrslitin bíða okkar ásamt Aston Villa, Man City og Leicester City.
Nú rétt í þessu var dregið í bikarnum og komið á hreint að næsti mótherji United í keppninni er Manchester City. Fyrri viðureign liðanna fer fram á Old Trafford þann 6. janúar en sú síðari þann 27. janúar á Etihad vellinum.
Næsti leikur er gegn botnliði Watford í deildinni á sunnudaginn kl 14:00.
Jonas says
Var reyndar búinn undir að Manc fengi þetta lið í Meistaradeildini, en þeir fá ekki allt sem þeir vilja.