Eitt skref fram á við, eitt skref aftur. Þetta er saga þessa tímabils og eftir frækinn sigur á Chelsea tók auðvitða við afspyrnuslakur leikur gegn Club Brugge. En jafnteflið hafðist og það er ágæt von fyrir leikinn í næstu viku.
En fyrst er það Watford sem kemur í heimsókn (já ég er búinn að tékka, engin mistök í þetta skiptið). Tveimur dögum fyrir jól fór United á Vicarage Road, þremur stigum á eftir Chelsea og tapaði auðvitað. Nú, níu leikjum síðar er United ennþá þremur stigum á eftir Chelsea og það sem meira er, í hádeginu á eftir tekur Chelsea á móti Spurs. Það má því aðeins vona, en það hefur verið frekar bitur reynsla af slíkum vonum í vetur.
Það sem jafnteflið í Belgíu færði hópnum var að sjálfsögðu smá hvíld lykilmanna og því má búast við eins sterku liði á morgun og völ er á
Það verða einhverjir til að setja spurningamerki við James þarna og það kann að vera einhver önnur lausn á því, hugsanlega 3-5-2 leikaðferðin nú eða að setja Martial út vinstra megin og leyfa Odion Ighalo að spreyta sig gegn sínum gömlu félögum. Eitthvað er óvíst með Mason Greenwood vegna veikinda og ef hann verður ekki með þá fáum við örugglega að sjá Ighalo byrja
Watford fékk byr í seglin eftir sigurinn á United, vann þrjá leiki í viðbót og gerði tvö jafntefli en tapaði síðan þremur leikjum í röð, þar á meðal gegn Tranmere í bikarnum sem veitti Tranmere leikinn gegn United, og gerði jafntefli í síðasta leik gegn Brighton
Í hóp Watford er það bara Daryl Janmaat sem meiddur en Ismaïla Sarr er að koma úr meiðslum og ekki víst hann byrji.
Watford er sem stendur í næst neðsta sæti deildarinnar þó stutt sé í liðin fyrir ofan en næsti leikur þeirra er gegn Liverpool og þessir tveir leikir gætu farið langt með að gera fallbaráttuna óvinnandi fyrir þá. Sigur þeirra á United fyrir jólin verður örugglega ræddur í undirbúningi beggja liða og það er eins gott að United dragi einhvern lærdóm af þeim leik ef ekki á illa að fara.
Leikurinn á morgun, sunnudag, hefst klukkan 2.
Skildu eftir svar