Rauðu djöflarnir

Meistaradeild Evrópu

Dráttur í Meistaradeild Evrópu í dag

skrifaði þann | 5 ummæli

Moskva, Rússland, 21 maí 2008.

Klukkan 15:45 í dag verður dregið í riðla í Meistaradeild Evrópu. Síðasti vetur var okkar slakasti í sex ár í Meistaradeildinni þannig að held að við séum flest nokkuð bjartsýn á að Man Utd geri a.m.k betur en síðasta vetur. Það eru þó margir mjög sterkir klúbbar sem gætu dregist í riðil með United, þetta gæti því orðið erfiður vetur. Við skulum svo sannarlega vona að við fáum frekar léttan drátt seinni partinn í dag.

Skoðum hvaða möguleika við höfum. Dregið verður eitt lið úr hverjum potti, og myndar það einn riðill. Það getur ekki komið upp sú staða að lið frá sama landi, lendi í sama riðlinum.

Pottur 1

  • Chelsea
  • Barcelona
  • Real Madrid
  • Manchester United
  • Bayern Munich
  • Arsenal
  • Porto
  • AC Milan.

Út frá UEFA stærðfræðinni þá er Arsenal í sterkasta pottinum, en ekki Man City.

Pottur 2

  • Valencia
  • Benfica
  • Shakhtar Donetsk
  • Zenit St Petersburg
  • Schalke
  • Manchester City
  • Braga
  • Dynamo Kiev.

Það er ekki séns að lenda með City, þannig að helst myndi ég vilja sleppa við Benfica, við vitum afskaplega vel hversu sterkir þeir eru. Best væri að fá Braga eða Schalke og sleppa þannig við vetrarferðir til Austur-Evrópu.

Pottur 3

  • Olympiakos
  • Ajax
  • Anderlecht
  • Juventus
  • Paris St Germain
  • Galatasaray
  • Lille
  • Spartak Moscow.

Ekki vitund slakari pottur en númer 2. Hér viljum við alls ekki Juventus og Paris St Germain, þó svo Frakkarnir hafi nú ekki verið sannfærandi í frönsku deildinni undanfarið. Lille, Anderlecht eða Olympiakos takk fyrir.

Pottur 4

  • Borussia Dortmund
  • BATE Borisov
  • Dinamo Zagreb
  • Malaga
  • Montpellier
  • FC Nordsjælland
  • Celtic
  • CFR Cluj.

EKKI DORTMUND TAKK FYRIR! Þó svo Man Utd hafi keypt Kagawa af þeim þá eru Dortmund ógnar sterkir og alls ekki völlur sem við viljum heimsækja. Restin skiptir mig ekki máli svo framarlega sem við fáum ekki Dortmund.

Annars kemur þetta allt í ljós seinni partinn í dag. Ég ætla að taka nokkur símtöl og sjá hvort ég get ekki fengið Barcelona, Man City, Juventus og Dortmund saman í riðil.

Leikmenn Slúður

Morgunfréttirnar

skrifaði þann | 4 ummæli

Dimitar Berbatov fagnar
Dimitar Berbatov fagnar

Eins og vænta má, þrem dögum fyrir lokun félagaskiptagluggans, ræður slúðrið ríkjum. Dimitar Berbatov er skv. fréttum í flugvél á leiðinni til Flórens í læknisskoðun eftir að United tók tilboði Fiorentina, sem ku vera um 4 milljónir punda. Virðist nokkuð vel staðfest frétt.

Moussa Dembélé, sem margir United menn hafa viljað sjá koma til félagsins, er hins vegar á leiðinni til Tottenham Hotspur eftir að þeir buðu þær 15 milljónir sem útkaupaklásúlan í samningi hans kvað á um. Orðið á götunni er að United hafi haft áhuga en ekki sem svaraði meira en 11 milljónum.

Og loks staðfesti Anderson það á Instagram að Nani væri EKKI á leiðinni frá félaginu. Sjáum til hversu áreiðanlegt það reynist.

Uppfært kl 21:50 (Sigurjón): Berbatov málið tók heldur betur óvænta stefnu núna í kvöld. Fiorentina voru að senda frá sér yfirlýsingu þess efnis að þeir hafi átt von á Berbatov í Flórens seinni partinn í dag en hann hafi hinsvegar ekki látið sjá sig, var það út af „hrokafullri hegðun annarra félaga“ eins og það var orðað. Juventus virðist nefnilega hafa blanda sér í málin sem og Fulham en þeir virðast ætla að nota sína Dembélé peninga í eitthvað gáfulegt, og það strax. Það verður spennandi að fylgjast með framvindu þessa málsins á næstu dögum.

Leikmenn Slúður

Verður Nani seldur??

skrifaði þann | 3 ummæli

Luís Carlos Almeida da Cunha…eða Nani.

Þær fréttir berast nú í morgunsárið að Zenit frá Pétursborg í Rússlandi sé á eftir Nani og hafi boðið 25 milljónir punda í piltinn. Það eru eflaust skiptar skoðanir um Nani en það er engin spurning að maðurinn hefur reynst liðinu mikilvægur og bjargað því upp á sitt einsdæmi, trekk í trekk. Þegar Nani er að spila á 100% afli þá er hann einn besti maður deildarinnar, engin spurning. Löstur hans er hinsvegar stöðuleiki, við erum ekki að sjá hans rétta andlit nema í kannski 30% leikja, restina af tímanum er hann svo sem að spila ágætlega, en virkar samt hálf bitlaus miðað við þann Nani sem við viljum alltaf sjá. Oft er hann svo að taka stórkostlega vondar ákvarðanir á mikilvægum tímapunktum, til dæmis í lok leikja þar sem Man Utd þarf á marki að halda.

25 milljónir hljómar ekki sem mikill peningur fyrir mann eins og Nani, svona miðað við hvernig leikmannamarkaðurinn hefur verið í sumar. Hann hefur verið tregur að skrifa undir þá samninga sem honum hafa verið boðnir og það er hættulegur leikur þegar Ferguson er hinum megin við borðið, sá gamli hefur afskaplega litla þolinmæði gagnvart stælum. Það er hinsvegar óþarfi að láta eins og samingur Nani renni út eftir hádegi á morgun, hann er ennþá samningsbundinn Man Utd til ársins 2014 og því engin ástæða til að selja hann á einhverjum afslætti. Selja hann hinsvegar á góðu verði og kaupa síðan Moutinho eða Rodriguez frá Porto? Jájá, það gæti alveg virkað!

Leikmenn Slúður

Rooney lengur frá?

skrifaði þann | 1 ummæli

Rooney gæti verið frá lengur en í mánuð.

Áhorfendur sáu Rooney skerast ansi illa á laugardaginn þegar Rodallega steig óvart ofan á innanvert lærið á honum. Ferguson talaði um fljótlega eftir leikinn að Rooney yrði frá í kringum fjórar vikur en nýjustu fréttir herma að skurðurinn reyndist mun verri en fyrsta skoðun gaf til kynna. Til að sauma Rooney saman þurfti víst að svæfa hann en skurðurinn ku hafa verið alveg inn að beini, sem er hrikalega brútal því það er ekki eins og Rodallega hafi notað beittan eldhúshníf. Talað er nú um að fjarvera Rooney gæti orðið nær tveimur mánuðum ef lærvöðvinn hefur orðið fyrir einhverjum skemmdum.

Liðið er nú ekki á flæðiskeri statt varðandi framherja en það hafa verið uppi háværar raddir þess efnis að Berbatov sé á leiðinni til Fiorentina fyrir 5 milljónir punda, sem gerir stöðuna athyglisverða því núna er spurning hvort Ferguson sé tilbúinn að láta hann fara fyrir lokun gluggans. Ljóst er að Van Persie, Hernandez og Welbeck eru allir á undan Berbatov í goggunarröðinni og á meðan Ferguson spilar bara með einn mann uppi á toppi þá er útlitið ekki bjart fyrir Berbatov um að hann fái að spila margar mínútur á næstu vikum, þrátt fyrir meiðsli Rooney.

Uppfært (kl 22:20): Rooney tjáði sig í fyrsta sinn eftir atvikið á Twitter og bar sig bara nokkuð vel. Gaf hann til kynna að lærið muni jafna sig að fullu og póstaði svo mynd af sjálfum sér rennislökum upp í sófa.

Tístið hjá Rooney: Thanks for all the messages of support. Gutted to be out for a while but my leg will be ok which is the main thing pic.twitter.com/98yTtndc

Enska úrvalsdeildin

Manchester United 3:2 Fulham

skrifaði þann | 1 ummæli

Fyrsta heimaleiknum er lokið með sigri okkar manna á spræku Fulham liði. Þetta leit ekki vel út í byrjun þegar Damien Duff kom gestunum yfir á 3. mínútu. En markið var ákveðið spark í rassgatið fyrir heimamenn sem tóku öll völd á vellinum. Patrice Evra átti fyrirgjöf sem virkaði frekar misheppnuð en Robin van Persie afgreiddi hana glæsilega framhjá Mark Schwarzer. Eftir það róaðist leikurinn örlítið en United var samt meira með boltann. Shinji Kagawa skoraði svo auðvelt mark eftir mistök frá Schwarzer sem varði skot Tom Cleverley beint í fætur Japanans sem gat ekki annað en skorað. Bakvörðurinn Rafael var mjög duglegur í sóknarleiknum í dag skoraði svo mark sem var dæmt af vegna rangstæðu réttilega en tæpt. Skömmu seinna átti Ashley Young fyrirgjöf sem Rafael af öllum mönnum skallaði í markið og United komnir í 3-1 og þannig var staðan í hálfleik.

Seinni hálfleikurinn var öllu rólegri þangað til að stórstjarnan Own Goal minnkaði muninn fyrir Fulham, Matthew Briggs átti fyrirgjöf sem að de Gea og Vidic reyndu við og Mladen Petric truflaði úthlaup de Gea og Vidic náði á ævintýrilegan hátt að setja hælinn í boltann og mark frá Fulham staðreynd. Eftir þetta voru Fulham komnir aftur í leikinn og mátti ekki miklu muna að þeir náðu að jafna leikinn en David de Gea náði að koma í veg fyrir það. Wayne Rooney sem kom inná sem varamaður um miðjan seinni hálfleikinn fór svo meiddur af velli skömmu fyrir leikslok. Leiknum lauk svo með 3-2 sigri á mjög kaflaskiptum leik.

  • Moussa Dembélé var frábær á miðjunni hjá Fulham og skapaði oft usla. En og aftur lendum við í vandræðum með líkamlega sterka leikmenn.
  • Michael Carrick verður að komast aftur á miðjuna, var aðeins of ágengur á köflum í vörninni.
  • Antonio Valencia ætti ekki spila bakvörð nema í neyð, hann er alltof mikilvægur partur af sókninni.
  • Robin van Persie, eitt skot, eitt mark.
  • Shinji Kagawa er að byrja rosa vel, sprækur með boltann og klókur að finna samherja.
  • Nani var ekki í hópnum og ekki mun það kveða niður sögusagnir um möguleg félagsskipti.
  • Wayne Rooney verður amk 4 vikur frá vegna meiðslanna sem hann varð fyrir í dag. Þetta myndi valda manni meiri kvíða ef við hefðum ekki Van Persie, Chicharito og Welbeck í staðinn.
  • David de Gea verður að styrkja sig meira til að koma í veg fyrir annað eins klúður þegar Fulham minnkaði muninn.
  • Jonny Evans var á bekknum í dag og vonandi stutt í að hann komi til baka í byrjunarliðið.