Í kvöld tryggði Manchester United sér Englandsmeistaratitilinn í tuttugasta sinn!!
Leikurinn í kvöld kláraðist í raun á fyrsta hálftímanum þegar United tryggði sér sigur með geysifínum leik, tveim góðum mörkum og einu stórfenglegu.
Það voru ekki þrjár mínútur liðnar þegar Robin van Persie var búinn að skora eitt mark og skjóta yfir af sex metra færi. Markið kom eftir eina og hálfa minútu, Sókn upp hægra megin, Valencia náði ekki að koma boltanum á hægri, gaf frekar til baka á Rafael sem gaf yfir á fjær, þar sendi Giggs viðstöðulaust fyrir og Van Persie setti hann alveg óvaldaður. Mínútu síðar kom sókn United og Van Persie setti góða fyrirgjöf Valencia yfir.
Annars komu Villa menn ákveðnir til leiks og spiluðu jákvætt þegar þeir voru með boltann, en United var hreinlega betra. Mark ársins kom svo á 12. mínútu. Kagawa gaf þvert á Rooney sem leit up og sá möguleika sem enginn átti að sjá, hamraði boltanum hátt og langt upp að teig, og Robin van Persie hljóp fullkomlega til að ná að skjóta viðstöðulaust. Þrumufleygur hans var allan tímann á leiðinni í markið og það var gaman sjá boltann syngja í netinu. Van Persie og Rooney fögnuðu svo einstaklega innilega eftir markið.
Annars dró úr hasarnum eftir þetta, enda United í hag að hægja á. Villa sótti nokkuð og varð nokkuð ágengt en Robin van Persie kláraði málið. Kagawa stakk langt fram á Giggs sem var ekki alveg eins snöggur og hann var fyrir tuttugu árum þannig að varnarmaður var kominn í hann inni í teig. Giggs gaf þá einfaldlega á Van Persie sem gaf sér góðan tíma áður en hann smellti boltanum í netið. 3-0 og 33 mínútur liðnar.
Villa komu sprækir út í seinni hálfleik og svona til að auka aðeins líkurnar á að verða maður leiksins skallaði Van Persie af marklínu í upphafi hálfleiksins, De Gea varði tvisvar eða svo en annars var þetta allt frekar tíðindalítið. Rooney fór útaf fyrir Welbeck á 70. mínútu, hafði spilað mjög vel á miðjunni. Kagawa var í sinni stöðu og Giggs á kantinum.
Kagawa átti dauðafæri sem honum tókst á óskiljanlegan hátt að skjóta yfir úr, en annars var þetta bara rólegt og sætt þangað til dómarinn flautaði leikinn af. Tuttugasti titillinn staðreynd, og þrettándi titill Sir Alex Ferguson og Ryan Giggs í höfn. Þeir hafa nú orðið meistarar jafn oft og Arsenal!
Það er spurning hvort gamli maðurinn hafi verið búinn að fá sér smá kampavín, en engu að síður í viðtali eftir leikinn þegar hann var að hrósa leikmönnum hverjum á fætur öðrum, sagði hann að Phil Jones gæti orðið besti leikmaður sem Manchester United hefur átt. Engin pressa, Phil!!
Látum svo myndirnar tala sínu máli!