Liðið lítur svona út:
Varamenn: Lammens, Heaton, Heaven, Leon, Maguire, Fredricson, Casemiro, Mainoo, Zirkzee.
Šeško byrjar, Cunha og Mount meiddir. Bayındır í marki. Ekkert sem kemur á óvart. City er líka í vandræðum, búnir að tapa fyrstu tveimur leikjum og það væri ekki leiðinlegt að koma þeim í frekara klandur. Donnarumma byrjar hjá þeim.
Það hafðist, fallegt var það ekki, en endamínúturnar voru mun jafnari en þær hefðu þurft að vera. Manchester United vann sinn fyrsta sigur í úrvalsdeildinni á þessari leiktíð gegn Burnley á Old Trafford í dag. Sigurmarkið kom í uppbótartíma.
United var töluvert betra í fyrri hálfleik og hefði trúlega getað gert út um leikinn þá. Liðið fékk snemma dæmda vítaspyrnu, sem var tekin til baka eftir VAR-skoðun, þegar Mason Mount féll við eftir viðskipti við Kyle Walker.
Fyrsta markið kom á 27. mínútu og var sjálfsmark. Casemiro skallaði eftir hornspyrnu í slána, þaðan hrökk boltinn í varnarmanninn og inn. United fékk fleiri góð færi, Mbeumo komst í ágæt skotfæri og Amad var einn við vítateigspunktinn eftir hornspyrnu. Hann fékk síðan besta færið rétt fyrir hálfleik, þegar United náði skyndisókn, Mbeumo gaf þvert fyrir markið en boltinn skoppaði þannig Amad setti hann yfir.
Að nýta færin ekki betur í fyrri hálfleik reyndist United dýrt þegar Foster jafnaði á 55. mínútu. De Ligt hafði farið út til vinstri til að loka, ákvað svo að fara til baka. Þetta þýddi að hvorki hann né Dalot voru á sínum stað til að loka á fyrirgjöf Bruun Larsen né hreinsa hana frá. Dalot sýndi hins vegar mikið harðfylgi rúmri mínútu síðar. Hann braust framhjá Walker og sendi fyrir á Mbeumo sem kom United aftur yfir.
En vesenið var ekki búið. Á 66. mínútu fékk Burnley innkast. Casemiro réði ekki við stóra manninn fyrir framan sig en sá skallaði inn á teiginn. Burnley fékk færi meðan United mistókst að hreinsa og maðurinn með hið áhugaverða nafn Jadon Anthony kom boltanum að lokum inn.
United sótti án þess að fá kannski afgerandi færi en á fjórðu mínútu uppbótartíma freistaðist Anthony til að toga í Amad sem var að hlaupa framhjá honum inn á teiginn til að taka við sendingu frá Bruno. Skjádómararnir sáu atvikið og í kjölfarið var dæmd vítaspyrna. Bruno mætti til að taka sitt fjórða víti á sex dögum og skoraði.
Bayindir hélt byrjunarliðssæti sínu í deildinni eftir martröð Onana gegn Grimsby. Bayindir er með góðar langar sendingar og slapp að mestu við horn í gær en hann hefði þurft að gera betur í öðru markinu. Markverðirnir hjá United gefa vörninni ekkert sjálfstraust.
United hefur eytt síðustu dögum í að eltast við Senne Lammens, ríflega tvítugan Belga frá Antwerpen. Það er galið að ætlast til að slíkur strákur sé svarið við þeim vandamálum og pressu sem er á markverði United. Ef peningur er til væri trúlega skynsamlegra að athuga með Emi Martinez.
Dalot kom inn í staðinn fyrir Dorgu og átti ágætan leik, hefði átt að gera betur í fyrsta markinu en bjó svo að segja til annað markið þannig það jafnast út. Hinu megin var Amad góður fram á við og skilaði því sem hægt var að ætlast til af honum varnarlega.
Cunha fór út af meiddur eftir hálftíma, trúlega með tognun aftan í læri. Sú er vonandi ekki alvarleg. Zirkzee kom inn í staðinn. Hann verðskuldaði það eftir ágæta innkomu gegn Grimsby. Hann hefur sína kosti, vinnur vel, vinnur skallaeinvígi eða tekur vel á móti boltanum og skilar á samherja. Hann er hins vegar ekki klassískur framherji sem skilar boltanum frá sér og sprettar svo inn á markteiginn, virðist frekar vilja lúra úti á teignum. Þá ákefð vantaði þá mínútur sem hann spilaði sem fremsti maður í gær.
Mason Mount átti skínandi fyrri hálfleik, næstum því vítið kom eftir að hann hafði pressað varnarmann og náð boltanum. Hann var að vinna bolta í pressu, en líka finna leikmenn í góðum stöðum í kringum sig, bæði með löngum og stuttum sendingum. Hann var tekinn út af í hálfleik til öryggis vegna meiðsla.
Mainoo kom inn, átti ágæta frammistöðu en ekkert afburða.
Sesko kom hins vegar inn á 72. mínútu fyrir Casemiro. Hann fékk lítið að gera fyrst, var með tvær snertingar fyrstu tíu mínúturnar. Hann sýndi síðan styrk sinn, Mbeumo sendi bolta fyrir sem var helst til of hár en Sesko náði með ótrúlegu stökki að skalla boltann.
Mbeumo. Of snemmt að fagna eftir fjóra leiki, en mögulega bestu kaup United í áraraðir – sem er kannski ekki hár standard. Leikskipulagið í fyrri hálfleik virtist vera að koma boltanum sem fyrst á hann og því fylgdu miðjumennirnir vel. Mbeumo kemur með mikinn hraða inn í leik United, hann teygir á andstæðingunum, hefur frábæra fyrstu snertingu, góð skot og sendingar, ekki síst úr föstum leikatriðum.
Leikmenn United fögnuðu sigurmarkinu gríðarlega, sem og öllu sem féll þeim í hag eftir það. Það er sérstakt, því nýliðar á Old Trafford ættu alltaf að vera þægilegur sigur. Ekki það að United gerði nóg í leiknum til að vinna þægilega en fögnuðurinn sýndi þá pressu sem er á liðinu. Gengi liðsins snýst frekar um sálarástand eftir áreiti og opinbera niðurlægingu fyrir mistök frekar en hvort það spilar 3-5-2, 4-2-3-1 eða gamla góða „four-four-fucking-two“.
Amorim sýndi mikið stress, meðan jafnt var gekk hann órólegur fram og aftur boðvanginn og horfði upp í stúku meðan Bruno tók vítið.
Hversu lengi getur vont versnað? Í kvöld lét Manchester United lið úr fjórðu deild Englands henda sér út úr enska deildarbikarnum. Verst er að það var heppni að United skyldi knýja fram vítakeppni.
Fyrra mark Grimsby kom á 22. mínútu. Diallo tapaði boltanum á miðjunni og Ugarte lét kjöta sig. Þar með skapaðist svæði til hægri, þaðan kom fyrirgjöf á fjærstöng þar sem Vernam var frír og skoraði.
Grimsby skoraði síðan annað mark sem dæmt var af því boltinn fór í hönd varnarmanns. Vörn United leit ekki vel út í því atviki en slapp með skrekkinn. Á 30. mínútu mínútu kom hins vegar mark þegar Onana missti af hornspyrnu og Warren, fyrrum unglingaliðsmaður United, skoraði í autt markið.
Grimsby-liðið var miklu betra í fyrri hálfleik. Sóknaruppbygging United var hæg og ómarkviss. Helst var líf í Sesko fremst en hann tók vondar ákvarðanir. Ungu mennirnir Fredicson og Hayden gátu engan vegin spilað boltanum út úr vörninni og voru einfaldlega í vandræðum með sóknarmenn Grimsby.
Ruben Amorim reyndi að bjarga því sem bjargað varð með þremur skiptingum í hálfleik. Dorgu, Ugarte og Fredicson fóru út fyrir Mbeumo, Bruno og de Ligt. Það var hins vegar snemma í hálfleiknum sem Grimsby fékk algjört dauðafæri til að skora þriðja markið en Heaven náði að fórna sér fyrir skot af markteignum.
Snemma í seinni hálfleik gerði úrhellisrigningu sem eiginlega drap leikinn niður á tímabili og reyndar eftir það voru leikmenn alveg í vandræðum með völlinn. Þegar rigningunni slotaði þyngdist sókn United og Mbeumo minnkaði muninn með góðu skoti á 75. mínútu.
Fimm mínútum fyrr hafði reyndar verið dæmt mark af Grimsby vegna rangstöðu. Sá sem skoraði var í rangstöðu þegar boltanum var leikið, hann breytti reyndar verulega um stefnu af Harry Maguire án þess að hann væri undir pressu, en samkvæmt nýjustu útgáfu reglnanna virðist dómurinn hafa verið réttur (fyrir áhugasöm má benda á útskýringu 13 í hagnýtum upplýsingum um rangstöðu í knattspyrnulögunum!)
United bætti í sóknina. Mount kom til dæmis inn fyrir Heaven og síðan var Amad fórnað fyrir Zirkzee. Gott færi fékkst eftir hornspyrnu en Grimsby bjargaði sér. Á 88. mínútu fékk United aðra hornspyrnu og hana stangaði Maguire inn á fjær og bjargaði því andliti United – í bili.
United fékk færi á lokasekúndum uppbótartímans þegar boltinn féll fyrir de Ligt og Sesko á markteig en boltinn var skoppandi og Slóveninn skóflaði honum yfir.
Í deildarbikarnum er engin framlenging heldur farið beint í vítaspyrnukeppni. Andre Onana varði þriðju spyrnu Grimsby og því gat Cunha tryggt sigurinn þegar hann fór til að taka fimmtu spyrnu United. Hún var arfaslök og varin. Ekki klúðruðust fleiri spyrnur og því varð að hefja annan hring. Í annarri spyrnu hans setti Mbeumo boltann í slána.
Það má vera að United hafi þótt gott gegn Arsenal á fyrsta degi. Það breytir því ekki að úr 22 skotum voru væntu mörkin (xG) 1,5 sem þýðir að skotið hefur verið úr lélegum færum. Til að fylgja þeirri spilamennsku eftir var eðlilegt að ætlast til þriggja sigra í þessari viku gegn Fulham, Grimsby og Burnley. Burnley leikurinn er nú einn eftir. Úrslitin og frammistaðan þýða hins vegar að United er komið í enn eina krísuna og virkilega spurt af alvöru hvort Amorim ráði nokkuð við starfið.
Síðustu dagar hafa verið litaðir af meintri óánægju Kobbie Mainoo með að fá ekki að spila og möguleikum á að hann verði seldur. Hann fékk að byrja í dag, hann var ekki verstur en ekkert frábær og sýndi takmarkanir sínar í löngum sendingum sem fóru út í buskann.
Það er ekki hægt að tína neitt jákvætt til eftir tap gegn fjórðu deildarliði. United veitti ekki af deildarbikarnum til að hafa verkefni fyrir hópinn sem er í stærra lagi miðað við úrvalsdeildina eina. Það hefði líka verið gott fyrir sjálfstraustið að eiga góða bikarkeppni, en það er mölbrotið enn og aftur.
Eflaust er freistandi að skella tapinu á Onana fyrir annað markið. Kannski hefði hann átt að verja annað markið, en það er erfitt að ætlast til að hann verji opið færi. Hann sýndi hins vegar af hverju hann var ekki valinn í fyrstu tvo leikina. Kannski er fertugur Tom Heaton skásti kosturinn núna.
Hvað er til ráða? Miðað við lýsingar blaðamanna á Amorim í viðtölum eftir leik virtist hann búinn að gefast upp. Sam Allardyce og Sean Dyche eru á lausu og þekktir fyrir að bjarga liðum frá falli. En sennilega er United frekar verkefni fyrir Galdrakarlinn í Oz.
Manchester United mætti á Craven Cottage þar sem heimamenn í Fulham tóku á móti þeim. United beið lægri hlut fyrir Arsenal í fyrstu umferðinni á heimavelli á meðan Fulham fór í heimsókn til mávanna í Brighton og stálu stigi á lokasekúndum leiksins.
Byrjunarlið United: Altay Bayindir, Leny Yoro, Matthijs de Ligt, Luke Shaw, Amad Diallo, Casemiro, Bruno Fernandes, Patrick Dorgu, Bryan Mbeumo, Mason Mount og Matheus Cunha.
Á bekknum voru þeir Andre Onana, Diogo Dalot (52′), Harry Maguire (87′), Joshua Zirkzee, Manuel Ugarte (69′), Ayden Heaven (87′), Benjamin Sesko (53′), Tyler Fredricson, Kobbie Mainoo.
United byrjaði eins og líf þeirra allra væri undir, svo mikil var ákefðin. Mattheus Cunha komst strax í þrusugott tækifæri en skotið hans rétt fyrir utan teig sveif nokkra sentimetra yfir slánna. Brasilíumaðurinn var svo aftur á ferðinni þegar hann fékk stungusendingu inn í teig sem endaði með því að hann setti boltann á milli fóta Calvin Bassey hjá Fulham en boltinn small neðst í fjærstöngina og út. Þetta var áður en við sáum tvær mínútur komnar á klukkuna.
Patrick Dorgu brunaði svo upp vinstri kantinn og slapp inn fyrir rangstöðugildru heimamanna, fékk boltann og komst í þröngt skotfæri en skotið endaði í hliðarnetinu. Áfram héldu gestirnir að gera sig líklega og voru um 70% með boltann fyrstu tíu mínúturnar sem lofuðu mjög góðu.
Það voru hins vegar heimamenn sem tóku völdin á vellinum næstu tíu til fimmtán mínúturnar eða svo. Þeir héldu boltanum töluvert og sáu til þess að United var bara í endalausum eltingaleik en leið og slökknaði í smástund á varnarlínunni tókst táningnum Josh King að skapa sér færi með því að taka gott hlaup inn fyrir vörnina og fá stungusendingu en Altay Bayindir var fljótur út á móti honum og varði vel með vinstri fætinum.
Næsta færi kom svo einmitt eftir langa sendingu frá Tyrkjanum sem þrumaði boltanum yfir völlinn, beint í átt að marki heimamanna og Cunha ýtti Andersen frá sér, tók frábæra fyrstu snertingu og steindrap boltann og var kominn einn á móti markmanninum. Hann opnaði líkamann og setti boltann í hægra hornið. En þá var komið að hinum markverðinum að sýna listir sínar. Bernd Leno kastaði sér í rétta átt og varði boltann meistaralega í horn.
En þá komum við að einmitt lykilorðinu, horn. Hættan sem skapaðist úr horninu var lítil sem engin en hinu meginn á vellinum, nánar tiltekið í vítateig United, skapaðist alltaf glundroði og hætta þegar heimamenn fengu horn. Trekk í trekk virtist Bayindir ætla að endurtaka leikinn og gefa mark eftir hornspyrnu en hann ýmist missti af boltanum, rann til eða var í einskismannslandi og bara klaufaheppni að við fengum ekki á okkur mark úr horni í þessum leik.
En þá kom að atviki leiksins. United fékk hornspyrnu og rétt eins og áður skapaðist ekki mikil hætta út frá henni en menn féllu hver um annan þveran í teignum eftir rúmlega hálftíma leik. Ekkert var dæmt en stuttu síðar var Chris Kavanagh kallaður í skjáinn. Kavanagh hafði látið leikinn ganga frekar mikið og lítið flautað í leiknum fram til þessa en í endursýningunni sást að Calvin Bassey tók blásaklausan Mason Mount og fleygði honum til í teignum en Casemiro og Tete féllu á sama tíma og kuðluðust allir leikmennirnir saman í eina væna hrúgu.
Í skjánum sá Kavanagh Bassey taka íslenskan glímuleik við fyrrum enska landsliðsmanninn og var ekki lengi að ákveða að blása í flautuna og benda á punktinn. Víti og auðvitað steig Bruno Fernandes sem hafði verið heldur hljóðlátur þennan fyrsta hálftíma. Á punktinum lenti hann í smá samstuði við Kavangah og kvartaði Portúgalinn yfir því og stillti boltanum aftur upp. Það hefði hann kannski ekki átt að gera því eitthvað við þetta allt saman gerði það að verkum að skot fyrirliðans fór himinhátt yfir markið.
Casemiro fékk síðan réttilega gult spjald fyrir dýfu eftir að hann reyndi að fiska aukaspyrnu fyrir utan teig heimamanna. Alex Iwobi átti svo hörku góðan sprett inn í teig eftir að hafa unnið boltann af Amad Diallo en sá stutti vann vel til baka og bjargaði í horn. Rétt áður en blásið var til hálfleiks fékk Muniz tækifæri til að skalla boltann í tómt markið úr hornspyrnu eftir skelfingarúthlaup Bayindir en skalli hans framhjá. Þá reyndi hann einnig bakfallsspyrnu rétt áður en flautað var tikl hálfleiks en hitti ekki boltann af um 15 metrum frá marki.
Sá síðari byrjaði ekki ólíkt þeim fyrri, United voru mun líflegri og sprækari en Fulham þurfti smástund til að komast í takt við leikinn. Amorim gerði breytingar snemma í síðari hálfleik og inn á komu þeir Diogo Dalot og Benjamin Sesko í stað Casemiro og Amad sem báðir hafa átt betri daga í United treyjunni.
Örskömmu síðar sýndi Leny Yoro enn og aftur frá á snilld sína sem miðvörður þrátt fyrir ungan aldur. Josh King virtist þá vera að sleppa einn inn í gegn frá miðjuboganum en Frakkinn knái fylgdi honum á eftir og tækling hans gerði það að verkum að færið rann út í sandinn en ef hann hefði klikkað hefði hann farið beint í sturtu.
Heimamenn fengu svo enn eina hornspyrnuna eftir misskilning milli Mount og Shaw en sem betur fer var skallinn frá Kenny Tete slakur og varð æfingabolti fyrir Bayindir sem líklegast hefur andað mun léttar í þann mund. Hinu meginn á vellinum fengum við svo hornspyrnu og að þessu sinni tókst okkur að skapa hættu út frá föstu leikatriði.
Bryan Mbeumo tók spyrnuna frá hægra horninu og fyrirgjöf hans endaði á Leny Yoro sem skallaði boltann áfram þangað sem hann lenti í bakinu á Muniz og þaðan í netið. Ekki fallegt mark og skráð sem sjálfsmark en engu að síður telur jafn mikið. Einhverjir heimamenn vildu sjá dómarann flauta markið af þar sem Yoro setti hendurnar á bakið á Bassey og ýtti við honum en á svona er sjaldnast dæmt í Úrvalsdeildinni.
Áður en langt var um liðið gerði heimaliðið tvær breytingar, Emile Smith-Rowe og Raúl Jimenez komu þá inn á fyrir Muniz og King en á sama tíma tók Amorim Mount útaf og setti Ugarte inn. Það tók ekki langan tíma fyrir varamennina hjá Fulham að stimpla sig inn.
United voru kærulausir eftir sókn heimamanna, hreinsuðu boltann út úr teignum og út vinstra meginn þar sem Diogo Dalot tók skringilegan snúning og tapaði boltanum. Heimamenn þustu í sókn og Jimenez sendi boltann inn í teiginn og varnarlína United virtist alveg sofandi. Iwobi tókst að pota boltanum áfram og á Smith-Rowe sem átti ekki í nokkrum vandræðum með að setja hann í netið. 1-1 og stuðningsmenn Fulham tóku trylling.
Eftir markið voru heimamenn líklegri til að stela sigrinum en United. Skiptingarnar hjá þeim virtust sannarlega hafa hjálpað þeim að skipta um gír en skiptingar United virtust gera það þveröfuga. Rétt undir lok venjulegs leiktíma voru félagarnir Harry Maguire og Ayden Heaven settir inn á og það var strax í næstu sókn sem United fékk hornspyrnu og rataði fyrirgjöfin á höfuðið á gamla fyrirliðanum sem setti boltann rétt framhjá markinu.
Leikurinn fjaraði svo út þar sem þreyta var farin að segja til sín hjá báðum liðum og mikið var um brot. Niðurstaðan var eitt stig á haus.
Næsti leikur er svo gegn Grimsby Town í deildarbikarnum en leikurinn fer fram á heimavelli Grimsby sem tekur um 8500 manns í sæti. Liðið leikur í League Two, þremur deildum neðar en þeir hafa ekki tapað leik í síðustu sex viðureignum sínum. Þangað til þá.
Þá er loksins komið að vertíðinni sem við höfum öll verið að bíða eftir. Enski boltinn er farinn aftur af stað eftir alltof langt hlé og Manchester United fékk það verðuga verkefni að bjóða gamlan óvin úr norðurhluta Lundúna á Old Trafford. Liðin áttu mjög ólíku gengi að fagna á síðustu leiktíð en á meðan Arsenal stýrði nokkuð örugglega inn í 2. sætið í deildinni, þriðja árið í röð og fór í undanúrslit Meistaradeildarinn þá var lið United að athlægi og endaði í 15. sæti. Í Evrópudeildinni komst liðið hins vegar í úrslitaleikinn en tapaði þar fyrir öðru Lundúnarliði sem spilaði ekki betur en United á tímabilinu.
Hins vegar virðist United hafa gert mjög góða hluti í sumar er varða leikmannamál og í raun hafa kaup liðsins líklegast farið fram úr vonum margra stuðningsmanna. Liðið byrjaði snögglega með því að kaupa Matheus Cunha frá Úlfunum en hann var með 62,5 millj. punda klásúlu og fór sumarið því vel af stað.
Eftir þetta hægðist reyndar verulega á og gerðist lítið í nokkrar viku og svo landaði liðið bæði Bryan Mbeumo og Benjamin Sesko. Það var því ágætis eftirvænting í loftinu á Old Trafford fyrir nýju leikmönnunum og ekki skemmdi fyrir að þarna voru að mætast liðin sem voru sitt á hvað orðuð við framherjana Sesko og Gyokeres sem enduðu svo í sitt hvoru liðinu.
Leikurinn fór fjörlega af stað og það voru heimamenn sem byrjuðu af krafti. Lið gestanna var mjög sterkt en þeir stilltu upp í raun nánast fjórum miðvörðum, Calafiori, Saliba, Gabriel og White. Nýji miðjumaðurinn þeirra ,Zubimendi, sem á að fylla í skarð Thomas Partey, byrjaði á miðsvæðinu með Rice og Ödegard og frammi voru þeir Martinelli og Saka, sitthvoru megin við nýja manninn Gyokeres.
Ruben Amorim stillti upp Bayindir í markið, þrátt fyrir að Onana hafi verið heill heilsu en hann hafði þó misst af öllu undirbúningstímabilinu, en í þriggja manna línu sáum við Leny Yoro, Matthjis de Ligt og Luke Shaw.
Diogo Dalot og Patrick Dorgu skipuðu bakvarðarstöðurnar og á miðjunni voru Bruno Fernandes og Casemiro. Framlínan samanstóð af þeim Mbeumo, Mount og Cunha.
Mbeumo komst nálægt því að skora snemma í leiknum eftir langa sendingu frá Bruno en David Raya sá við honum í markinu. Patrick Dorgu átti síðan skallatilraun í átt að marki eftir aukaspyrnu frá Bruno en ekki mikil ógn fyrir Spánverjann í markinu.
Þrátt fyrir að vera mun sterkari framan af og líflegri en þreytulegir Arsenal menn þá voru það gestirnir sem komust fyrst á blað. Það var eins og skrifað í skýin að markið kæmi eftir að Arsenal fékk sína fyrstu hornspyrnu. Veikleiki United, styrkleiki Arsenal.
Rice tók hornspyrnuna og Arsenal hraðlestin stefndi að marki. Boltinn sveif í átt að marklínunni, Altay Bayindir stökk upp með Saliba og Mount vafða utan um sig og sló aumkunnarlega í tuðruna sem svo datt fyrri fætur Calafiori. Sá ítalski var snöggur að hugsa og potaði boltanum yfir línuna og kom gestunum í forystu, 0-1.
En United virtust ekki slegnir út af laginu eins og oft gerðist á síðustu leiktíð. Þvert á móti tóku þeir skellinum og virtust ætla að bíta frá sér undir eins. Stuttu eftir fiskaði fyrirliðinn okkar aukaspyrnu rétt fyrir utan teiginn hjá Arsenal en skot hans úr henni fór beint í vegginn.
Áður en hálftími var liðinn af leiknum komst Mbeumo upp vinstri kantinn og komst í skotfæri en David Raya var snöggur niður og náði að blaka höndinni í boltann og stýra honum aftur fyrir í horn sem ekkert varð úr.
Patrick Dorgu var mjög líflegur og hljóp eins og þindarlaus væri í leiknum en Daninn komst í færi þegar 30 mínútur voru komnar á klukkuna. Hann hafði brunað upp kantinn og opnaði svo líkamann og setti fast skot á markið, framhjá markverðinum en því miður small boltinn í fjærstönginni utanverðri.
Ekki leið á löngu áður en næsta færið leit dagsins ljós en þá kom Mattheus Cunha og stimplaði sig inn í leikinn af krafti þegar hann tók boltann frá eigin vallarhelming, setti undir sig hausinn og keyrði þráðbeint í gegnum miðjuhringinn framhjá hverjum Arsenal leikmanninum rétt eins og þeir væru æfingakeilur. Hann komst upp að teig gestanna en þegar kom að því að taka í gikkinn missti hann örlítið jafnvægi og skotið varð slakt.
Nýju leikmennirnir, Mbeumo og Cunha spiluðu svo laglega saman sem endaði með skoti frá Brasilíumanninum en aftur varði Raya. United var að banka og banka og eflaust mörgum fundist mark liggja í loftinu.
Hann var svo aftur á ferðinni þegar hann þvingaði Raya í frábæra vörslu eftir að hann komst upp vinstri vænginn og henti í þrusugott skot. Gestirnir héldu forystunni inn í hálfleik þrátt fyrir að United hefði sett töluverða pressu á þá.
Það var áberandi að Bukayo Saka og Gyokeres voru varla búnir að vera í mynd í fyrri hálfleik og eflaust enginn þeirrar skoðunar að þeir hafi átt góðan leik þessar fyrstu 45 mínútur.
Síðari hálfleikur byrjaði ekki eins fjörlega og sá fyrri en það voru félagarnir Mason Mount og Luke Shaw sem léku sín í milli sem endaði með því að Mount tók skot að marki sem fór í varnarmann og náði öðru skoti strax í kjölfarið en töluvert framhjá markinu.
Eftir um tíu mínútna leik kom Amad Diallo inn fyrir Diogo Dalot sem hafði átt mjög flottan leik. Áfram héldum við að pressa á þá en þéttur varnarleikur þeirra gaf ekki mikil tækifæri og það reyndist United erfitt að skapa færi.
Á 65. mínútu kom nýjasti leikmaður United á völlinn en Benjamin Sesko sem kom frá RB Leipzig í Þýskalandi og uppskar mikið lófaklapp frá áhorfendum. Á sama tíma kom Manuel Ugarte inn fyrir Casemiro en innkoma hans reyndist engan veginn góð. Úrúgvæinn virtist engan veginn komast í takt við leikinn og vill sjálfsagt fljótt gleyma þessum leik sem fyrst.
Þegar korter var eftir eða rúmlega það byrjaði United að þrýsta og kreista varnarlínu Arsenal með öllum tiltækum ráðum. Cunha stakk varnarmanninn sinn af og kom boltanum á Mbeumo en samherji hans þvældist fyrir honum og skotið varð eftir því.
Dorgu átti síðan fyrirgjöf sem rataði á nýbónaða pönnuna á Mbeumo en enn og aftur var David Raya vel á verðinum og þurfti að hafa sig allan við að verja frá Kamerúnanum knáa. Amad Diallo komst líka í skotfæri en Raya varði enn á ný.
Áður en lokaflautið heyrðist tókst United að koma boltanum inn í teiginn þar sem Saliba virtist sparka aftan í vinstri fótlegginn á Cunha sem féll við. Simon Hooper á flautunni lét sér fátt um finnast og lét leika halda áfram og VAR virtist ennþá vera í sumarfríi.
Leikar enduðu því 0-1 fyrir Arsenal sem verður að segjast ósanngjörn úrslit. United var 61% með boltann á móti 39% Arsenal en þeir skoruðu snemma og virtust tilbúnir til að reyna halda út. United átti 22 skot og þarf af 7 á rammann en það hefur ekki gerst í viðureign þessara liða síðan við unnum 8-2.
Heilt yfir spilaði liðið fantavel en það var auðséð að vélin er ekki orðin vel smurð og nýju leikmennirnir enn að finna taktinn með restinni af liðinu. Það er þó bjartar yfir mönnum og meiri liðsheild en á síðustu leiktíð. Áfram virðist þó augljós að það eru veikir hlekkir í liðinu og þörf á frekari liðsstyrk áður en sumarglugginn lokar.
Næsti leikur er gegn Fulham á Craven Cottage á sunnudaginn næstkomandi.