Rauðu djöflarnir

Evrópudeildin

Manchester United 5-4 Lyon: Sá góði, sá vondi og sá ótrúlegi

skrifaði þann | 12 ummæli

Embed from Getty Images

Manchester United komst í gærkvöldi í undanúrslit Evrópudeildarinnar eftir 5-4 sigur á Lyon og 7-6 samanlagt. Leikurinn innihélt góðan hálfleik, slæman kafla, algjört klúður og ótrúlega endurkomu.

United komst yfir strax á tíundu mínútu. Alejandro Garnacho snéri sig fram hjá tveimur varnarmönnum í teignum og sendu út þar sem Manuel Ugarte mætti og sendi boltann í netið.

United fékk fleiri færi í hálfleiknum, Bruno Fernandes átti skot í þverslána, tók boltann viðstöðulaust á lofti eftir að hafa runnið. En Lyon fékk líka færi. Andre Onana virtist hafa haft gott af hvíldinni gegn Newcastle á sunnudag og varði vel í tvígang.

Þegar rétt var komið inn í uppbótartíma fyrri hálfleiks lyfti Harry Maguire boltanum inn á teiginn hægra megin, þar slapp Diego Dalot inn fyrir varnarmann Lyon, lagði fyrir sig boltann og smellti honum í hornið fjær. United fór þar með inn í leikhléið með 2-0 forskot og virtist með öll völd.

Glatað færi Garnacho

Einn af vendipunktum leiksins kom á 50. mínútu. Garnacho slapp inn fyrir vinstra megin, stakk af varnarmann, kom sér í skotstöðu einn á móti markmanni en skaut beint á hann. Færi sem þetta enda í markinu í flestum tilfellum og hefði þarna væntanlega gert út af við leikinn.

En Lyon slapp fyrir horn og nýtti það, eftir að Malick Fofana og Alexandre Lacazette komu inn á. Corentin Tolisso minnkaði muninn á 71. mínútu í kjölfar hornspyrnu og – eins og of oft gerist með United – þá fékk liðið á sig tvö mörk á stuttum tíma. Nicolas Tagliafico jafnaði sjö mínútum síðar þegar hann mætti á fjærstöngina eftir sendingu frá hægri.

Skipt of seint?

Skiptingarnar höfðu snúið leiknum Lyon í hag. Franska liðið var miklu meira með boltann í seinni hálfleik og lét United hlaupa. Ruben Amorim hafði beðið með skiptingar. Í hálfleik þurfti hann að skipta Nassouir Mazraoui út af fyrir Luke Shaw. Reyndar átti Victor Lindelöf að koma inn en eftir leikinn var skýrt frá því að bæði Mazroui og Lindelöf hefðu þurft að fara frá Old Trafford vegna fjölskylduaðstæðna. Ekki hefur verið skýrt frá því í hverju þær fólust að öðru leyti en báðir leikmennirnir væru í lagi. Ruben skipti loks á 86. mínútu. Út fór Rasmus Höjlund fyrir Kobbie Mainoo, sem fór þá fram og Mason Mount kom inn á miðjuna fyrir Ugarte.

Enn var tími fyrir eina vendingu í viðbót. Tolisso, fyrirliði Lyon, eiginlega rakst í Leny Yoro sem var að hlaupa inn í svæði. Hlaupið hefði komið Yoro í vænlega stöðu og því gaf svissneskur dómari leiksins Tolisso hans annað gula spjald og þar með rautt. Markvörður Lyon lagðist strax niður með skyndileg meiðsl, sem sennilega voru helst til þess að samherjar hans gætu ráðið ráðum sínum. Eftir markið opnuðust upp svæði og United fékk nokkur hálffæri en tókst ekki að klára leikinn þarna.

Áföll

Þrátt fyrir liðsmuninn tókst United ekkert að skapa í fyrri hálfleik framlengingar. Christian Eriksen kom inn fyrir Garnacho og Harry Amass fyrir Patrick Dorgu á 100. mínútu. En á 105. mínútu kom annað stóra áfallið. Fofana geystist upp vinstri kantinn og sendi boltann inn á vítateigsbogann þar sem Ryan Cherki mætti og smellti honum niður í hornið.

Ruben Amorim mætti beint út í hléið með leikkerfi. Leikmenn United röðuðu sér í hring og horfðu á þjálfarann hreyfa til seglana. Strax þegar seinni hluti framlengingarinnar hófst var breytingin augljós – Harry Maguire var settur fram og auðu svæðin nýtt til að komast í vænlega sendingastöðu í áttina að honum. Leið númer eitt eins og hún gerðist best meðan United hafði Maroune Fellaini.

En United átti enn áfall í vændum. Á 110. mínútu slapp Fofana upp vinstri kantinn, lék að þessu sinni sjálfur inn á teiginn þar sem Luke Shaw felldi hann. Lacazette skoraði úr vítinu og Lyon virtist vera á leið í undanúrslit eftir ótrúlegt hrun United.

Tíu trylltar mínútur

Í hönd fóru tíu mínútur sem flestir stuðningsmenn United munu muna hvar þeir voru, hversu viljugir sem þeir verða til að viðurkenna það. Margir stóðu upp frá sjónvarpinu, ýmist slökktu eða fóru að búa sig í háttinn. Aðrir sukku niður í sófann eða hraunuðu yfir liðið á samfélagsmiðlum.

Casemiro gaf vonina. Hann náði einum af háu boltanum sem komu inn á teiginn og var í ljómandi góðu færi þegar varnarmaður Lyon sparkaði í hann. Dómarinn dæmdi fyrst ekki víti, sá trúlega ekki inn í þvöguna. VAR-myndirnar voru nokkuð skýrar og United fékk vítið sem Bruno skoraði úr.

Þar með voru 114. mínútur komnar á klukkuna en ljóst að uppbótin yrði rífleg, eftir tvo VAR-dóma og drjúg fagnaðarlæti Lyon. Svo það var bara að halda áfram að dæla boltanum inn að Harry. Ljóst var að Lyon liðið væri orðið þreytt og þjálfarinn Fonseca reyndi að skipta inn á ferskum varnarmanni.

Mínúta 120. Bruno með boltann fyrir utan teiginn vinstra megin, stutt sending á Casemiro sem kemur á móts við boltann og vippar honum inn á Mainoo, sem snýr á einn varnarmann og sendir boltann í fjærhornið. Stuttu síðan kemur skiltið upp – fimm mínútur í viðbót. Áfram.

120+1. Casemiro sendir boltann, Maguire á fjær, skalli. 5-4. Það gjörsamlega ótrúlega.

Fjórar mínútur eftir, rúmar. Fagnaðarlætin voru skiljanlega sturluð, tóku tíma og því viðbót. Magurie sendur aftur í vörnina. En engin frekari færi -frá Lyon eða öðum og United er komið í undanúrslitin gegn Atletic Bilbao.

Það góða

Casemiro, Harry Maguire og Bruno drógu vagninn á ögurstundu, reyndar hefur Bruno dregið United-vagninn síðustu mánuði og sem fyrr fór sóknarleikurinn mest allt kvöldið í gegnum hann. Casemiro vann vítið og átti síðan tvær sendingar á þessum eftirminnilega lokakafla, en heilt yfir leikinn var hans tölfræði mjög góð, eins og 9/12 einvígum unnin. Maguire átti reyndar ekki sinn besta dag í vörninni, hann sat stundum eftir gegn snörpum Lyon mönnum en þetta mark.

Það má líka gefa Garnacho hrós, þótt klúðraða færið hafi nærri orðið dýrt, þá var þetta meðal hans betri leikja fyrir United. Hann ógnaði alltaf Lyon með hraða sínum þegar United náði að sækja hratt.

Við megum ekki gleyma því að hér varð hrun

Hér byrjar jarðtengingin. Það eitt og sér að missa niður 2-0 forskot í jafn mikilvægum leik er afsakanlegt. Að vera manni yfir og fá á sig tvö mörk í viðbót í slíkum leik er ófyrirgefanlegt – nema þegar endurkoman verður jafn mögnuð og raun ber vitni.
Mörkin eða þetta hrun var engum leikmanni að kenna, þetta var sameiginlegt. Þó má kannski halda því til haga að innkoma Shaw var skelfileg, hann gaf vítið og var sýnilega ekki í neinni leikæfingu. Við því var kannski ekki að búast, tíu mínúturnar gegn Newcastle á sunnudag voru hans fyrstu síðan í byrjun desember. Hann spilaði í gær 74. mínútur, það lengsta sem hann hefur spilað síðan gegn West Ham 4. febrúar 2024.

Hvað næst – í Evrópudeildinni?

Bilbao er trúlega besta liðið sem United hefur mætt í keppninni í vetur. Liðið er í fjórða sæti á Spáni og með sterka leikmenn eins og Williams-bræður, Inaki og Nico og landsliðsmarkvörðinn Unai Simon. Á móti má benda á að United hefur unnið lið sem komist hafa langt í keppninni. Rangers féll út í 8 liða úrslitum og Bodo/Glimt er komið í undanúrslitin. Þegar flautað var af á Old Trafford passaði að skipta yfir á leik norska liðsins við Lazio þar sem vítakeppni hófst.

Hvað næst – í ensku deildinni?

United mætir Wolves klukkan 13 á sunnudag. United er í leiðinda stöðu, þremur stigum frá 17. sæti, því næsta fyrir ofan fall. Ekki að liðið verði nokkurn tíma í fallhættu, um helgina gæti endanlega orðið tölfræðilega ómögulegt fyrir Ipswich og Leicester að hætta.

En hvert sæti skiptir máli fjárhagslega og Wolves er eitt fárra liða neðar en United. Amorim sagði strax eftir leikinn að Evrópudeildin væru forgangsatriði þannig að von væri á að yngri leikmenn myndu spila í deildinni. Það sást glöggt þegar leið á leikinn í gær að leikmenn United voru þreyttir, til dæmis Dalot sem hefur leikið hefur flestar mínútur í vetur í krefjandi stöðu.

Með þunnskipaðan hóp má United ekki við meiðslum, sérstaklega ekki í framlínunni. En kannski hefur verið uppgötvaður nýr framherji í Kobbie Mainoo – það má að minnsta kosti alltaf senda Maguire fram – hann þarf ekki nema kortér þar til að skora!

 

 

Enska úrvalsdeildin

Manchester United 0:0 Manchester City

skrifaði þann | 1 ummæli

Liðið sem Ruben Amorim stillti upp leit svona út:

Varamenn: Bayindir, Amass, Kukonki, Lindelöf, Shaw, Erikssen, Mount, Obi, Zirkzee

Leikurinn byrjaði, United tók boltann, fór upp og allt í einu var Garnacho kominn innfyrir nokkrum metrum innan vallarhelmings City, óð upp að teig og Rúben Diaz tók hann niður hálfum meter fyrir utan teig. City stálheppnir að þetta var ekki víti, aukaspyrna Bruno fór beint í vegginn, enda alltaf erfitt að koma aukaspyrnu þetta nálægt framhjá.

Þessi hressa byrjun sló ekki beint tóninn fyrir framhaldið, leikurinn nokkurn veginn í járnum fyrsta kortérið, City meira með boltann en United sáttir við að taka á þeim framan við teig, og án teljandi vandkvæða. Fyrsta alvöru færið kom svo í hlut United, Dalot gaf fyrir, Ugarte missti af skalla og boltinn fór á fjær stöngina þar sem Garnacho hafði val um að reyna að stinga sér fram og skalla eða taka boltann á lofti, reyndi hið fyrrnefnda en tókst herfilega og ekkert varð úr því. Önnur prýðileg sókn kom skömmu síðar, Garnacho fékk stungu upp hægra megin fór upp og gaf út í teiginn þar sem Dorgu kom að en fyrsta snerting var skelfileg og boltinn fór til varnarmanns. Eins og sást af þessum færum voru gagnsóknir United ágætar og menn hreyfanlegir, meðalstaða leikmanna United þessar fyrstu tuttugu og fimm voru allar á eigin vallarhelmingi, utan garnacho sem var nokkru framar vinstra megin. Dorgu var aftur í sviðsljóinu í næstu sókn United, fékk þá sendinguna frá Bruno, skaut og hátt yfir. Ekki alveg dagurinn hans inni í teig.

En gagnsóknirnar héldu bara áfram og enn og aftur komust United fram fleiri móti vörn, næst var það vippa frá Bruno, hverjum öðrum og núna var það Ugarte sem hitti ekki boltann almennilega í skotinu. United þegar hér komið sögu með fleiri snertingar í teig City en öfugt, eitthvað sem við höfum ekki alveg verið að sjá undanfarið.

Það kom þo að því að að City ógnaði, en það var samt aðallega United vörnin sem sá um það, horn frá vinstri, Maguire, Onana og Yoro fóru allir í boltan og hann fór í átt að fjær stöng en Maz var á réttum stað og skallaði frá.

Alveg ásættanlegur fyrri hálfleikur og hefði ekki þurft mikið til til að United hefði farið inn í klefa með forystuna.

Seinni hálfleikur var svo ekki alls ósvipaður utan að City gat lokað betur á sóknir United. United gaf hins vegar ekkert eftir varnarlega og leikurinn var orðinn mjög lítið fyrir augað. Það var varla nokkuð sem var þess virði að færa til bókar fyrr en Zirkzee skaut að marki á 78, mínútu og Ederson þurfti að verja.

Eins og í fyrri hálfleik voru United mun líklegri að komast inn í teig andstæðinganna en það var samt ekkert af því að búa til alvöru hættu, ekki frekar en langskot City.

Þetta var dapur leikur fyrir hlutlausa en við virðum stigið sem Amorim lagði upp með að verja. Það reyndist frekar auðvelt og með smá heppni hefði getað farið betur.

Það er rétt að minnast á að Bruno Fernandes var langbesti maður vallarins. Að einhver umræða hafi farið á flug um að hann sé á einhvern hátt ekki nógu góður er auðvitað fullkomlega galið. Þetta er besti leikmaður United síðan Sir Alex fór frá, ekki nokkur einasta spurning um það. Hefur haldið liðinu á floti eftir besta megni síðustu ár

 

Evrópudeildin

Real Sociedad 1 – Manchester United 1

skrifaði þann | 1 ummæli

Embed from Getty Images

Evrópudeildin er orðin síðasti möguleiki Manchester United á að ná einhverju út úr tímabilinu. Liðið spilaði ágætlega lungann úr leiknum gegn Sociedad í kvöld en fékk á sig svekkjandi jöfnunarmark og slapp loks með skrekkinn.

Það var fátt um færi í fyrri hálfleik, en þau fáu sem gáfust féllu fyrir United. Það besta var trúlega þegar liðið átti þrjár marktilraunir í röð úr teignum, fyrst Bruno og síðan tvær frá Zirksee. Sú seinni hælspyrna fyrir aftan bak sem sendi boltann rétt framhjá fjærstönginni.

Mark United kom á 57. mínútu. United náði að losa um hægri kantinn, Diego Dalot sendi boltann á Garnacho sem renndi honum inn á völlinn að vítateigsboganum þar sem Zirksee mætti og lagði boltann á markið. Markvörður Sociedad var illa staðsettur þannig boltinn fór inn nánast fyrir miðju marki.

Ferskir fætur hjá Sociedad snúa leiknum

Fimm mínútum síðar gerði þjálfari Sociedad þrefalda skiptingu á liði sínu. Meðal þeirra sem komu inn var Orri Steinn Óskarsson. Nýjum mönnum fylgdi aukinn kraftur gegn liði United sem var þreytt, enda hafði það spilað 120 mínútur síðasta fimmtudag.

Á 73. mínútu var leikurinn stöðvaður eftir að United var dæmd aukaspyrna. Verið var að skoða vítaspyrnu og grunurinn beindist að hornspyrnu sem Sociedad skömmu áður. Enginn hafði beðið um neitt og ekkert endursýn, en dómarinn þurfti ekki nema eina umferð á myndunum, boltinn hafði verið skallaður í hendi Bruno Fernandes sem lyfti henni upp fyrir höfuð og þar með í óeðlilega stöðu. Mikel Ovarazabal, fyrirliði Sociedad skoraði.

Það sem eftir var átti United í nokkru basli. Orri Steinn fékk mjög gott færi á 84. mínútu en hitti ekki rammann. Í uppbótartíma stakk hann Mathijs de Ligt af og átti gott skot sem Onana varði vel.

Að þreyja þorrann

Ruben Amorim sagði eftir leikinn að United þyrfti að komast í gegnum leikinn gegn Arsenal og mæta til leiks gegn Sociedad næsta fimmtudag. Þannig er staðan einfaldlega. Tíu leikmenn liðsins eru meiddir og fjölgaði vonandi ekki í kvöld. Liðið var með sjö varamenn, þar af þrjá beint úr unglingaliðinu. Síðustu tuttugu mínúturnar virtust þeir sem hófu leikinn mikið til vera búnir á því. Góðu fréttirnar eru að Toby Collyer er kominn aftur eftir meiðsli og náði nokkrum mínútum í kvöld.

Zirksee

Hollendingurinn skoraði sitt fyrsta mark í Evrópudeildinni í kvöld og það sjötta á tímabilinu. Í stöðu þar sem United þarf allar hendur á dekk verður að virða framlag Zirksee. Hann er ekki sjá fljótasti, leiknasti eða sterkasti, en hann er alltaf af, les leikinn ágætlega og hefur tækni til að losa um samherja sína. Hann vann til dæmis 7/12 návígum sínum í kvöld, vann tvær tæklingar, komst inn í tvær sendingar og lokaði á eitt skot. Það er mun betri tölfræði en hjá þeim heillum horfna Rasmus Höjlund.

 

Enska úrvalsdeildin

Manchester United 3 – Ipswich 2

skrifaði þann | 5 ummæli

Embed from Getty Images

Það er undarlegt að skrifa sum orðin – en Manchester United vann í kvöld mikilvægan sigur á Ipswich í fallbaráttu ensku úrvalsdeildarinnar. Vel útfærð föst leikatriði og viljastyrkur Bruno Fernandes gerðu gæfumuninn.

Misskilningur milli Patrick Dorgu og Andre Onana strax á fjórðu mínútu varð til þess að Jadon Philogene skoraði í autt markið. United svaraði þessu vel og tók völdin á leiknum, hélt uppi ágætum hraða og sótti á Ipswich.

Það skilaði marki á 22. mínútu þegar Sam Morsy, fyrirliði Ipswich, skallaði aukaspyrnu Bruno Fernandes í eigið mark. Fjórum mínútum síðar komst United yfir með marki Mathijs de Ligt, sem fylgdi eftir þegar markvörður Ipswich hélt ekki skoti Diego Dalot. Skot de Ligt var þriðja marktilraun United eftir hornspyrnu Bruno.

Brottrekstur Dorgu snýr leiknum

Eftir þetta var United með tök á leiknum og virtist í sjálfu sér í fínum málum þegar Dorgu fór í tæklingu á Omari Hutchinson niður við varamannabekkina skömmu fyrir hálfleik. Þótt báðir þjálfararnir stæðu við þá sýndu þeir lítil viðbrögð. Endursýningar sýndu hins vegar fljótt að Dorgu hafði farið með takkana af afli í sköflunginn á Hutchinson. Eftir drjúga stund varð rautt spjald því niðurstaðan.

Ruben Amorim ákvað strax að skipta Noussari Mazraoui inn fyrir Alejando Garnacho, þótt Argentínumaðurinn hefði verið líflegur. Garnacho virtist ekki taka skiptingunni vel og fór beint inn í klefa.

Reyndar fór liðið allt í rugl og á þeim fáu mínútum sem eftir voru tókst Ipswich að jafna. Þar var Philogene aftur á ferðinni, hann sendi boltann frá hægri inn að markinu, Liam Delap hljóp að sendingunni, náði henni ekki, en ógnaði nóg þannig að Onana þurfti að bíða og þegar hann gat brugðist við var það orðið of seint.

Fengnum hlut haldið með baráttu

Það var því nákvæmlega engin ástæða til bjartsýni í seinni hálfleik, en ekki var nema rétt rúm mínúta liðin af honum þegar Bruno Fernandes tók fasta hornspyrnu sem Harry Maguire skallaði inn.

Það sem eftir var leiks hafði Ipswich boltann. United varðist hins vegar vel, de Ligt og Maguire lokuðu aðgengi að teignum, auk þess sem leikmenn Ipswich tóku vondar ákvarðanir, einkum undir lokin. United menn fögnuðu öllum unnum návígum, Casemiro, til að mynda innkasti sem hann vann af harðfylgi. En hvert er liðið komið þegar unnið innkast er orðið sérstakt fagnaðarefni?

Miðað við hvert stefndi þegar Dorgu var rekinn út af má ætla að United hefði haldið áfram og bætt við mörkum. Það var þó ekkert gefið, liðið nýtti þau færi sem gáfust einkar vel í kvöld. Mest um vert var að ná í þrjú stig. United er þar með væntanlega úr mestu fallbaráttunni, hefur 33 stig en Ipswich og Leicester í fallsætunum eru með 17 þegar 11 umferðir eru eftir.

Fátt í leiknum vekur vonir um stig gegn betri liðum – en það verður að viðurkennast að barátta liðsins í seinni hálfleik, mann færri, var virkilega góð. Kannski þetta sé leiðin, að pakka liðinu saman við teiginn og halda hreinu. Það væri framför á því sviði.

Tíu djarfir djöflar – einn heimskur drengur?

Dorgu hefur litið vel út sóknarlega í fyrstu leikjunum en það eru miklar gloppur í varnarleik hans. Hann slapp við athygli fyrir fyrsta mark Everton á laugardag, þegar hann fór upp í skallabolta og þvældist fyrir de Ligt. Hann kostaði fyrsta markið í dag og næstum leikinn með rauða spjaldinu. Hann er ungur og því fylgir óstöðugleiki og mistök. En það verður að sætta sig við það ef trúin er að leikmenn verði á endanum góðir. Fyrst leikurinn vannst þá skulum við ætla að Dorgu læri af mistökunum og við erfum þau því ekki við hann.

Bruno, Bruno, Bruno

Sex síðustu mörk United hafa komið upp úr föstum leikatriðum frá Bruno. Hann bar liðið á herðum sér þegar því tókst að jafna gegn Everton um helgina og í kvöld var það hann sem virkilega sýndi viljann. Það er að minnsta kosti eitthvað rétt í gangi á æfingasvæðinu þegar föst leikatriði skila mörkum, en þess á milli var Bruno virkilega að reka leikmenn áfram og skila sínu.

Seint í leiknum komst hann í skyndisókn, hljóp eina 70 metra upp boltann með kantinn. Fyrirgjöf hans fór rétt framhjá Mazraoui og því miður til Ipswich sem fór í skyndisókn sem þýddi að Bruno þurfti að spretta aftur. Sú sókn var stöðvuð niður undir teig og sjónvarpsvélarnar sýndu Bruno halla sér fram til að ná andanum.

Rasmus Höjlund

Danski framherjinn er gjörsamlega heillum horfinn. Hann tapaði öllum sex einvígum sínum í leiknum, United heldur ekki boltanum með slíkan framherja. En hér verður athyglinni beint að tveimur atvikum með stuttu millibili sem trúlega urðu til þess að honum var skipt út af um miðjan seinni hálfleik.

Fyrst var það sending frá Yoro, sem hafði snúið varnarmann glæsilega af sér, uppi í vinstra horninu og sent boltann út í teiginn á Höjlund. Daninn valdi að láta boltann fara milli fóta sér, í von um að samherji væri fyrir aftan hann, í stað þess að reyna að koma honum á rammann eins og sérhver framherji með sjálfstraust hefði gert.

Augnabliki síðar brjálaðist de Ligt út í hann. Þrátt fyrir skipanir miðvarðarins elti Höjlund ekki leikmann Ipswich sem kom hlaupandi af miðjunni inn á teiginn. De Ligt sat þar með uppi með tvo leikmenn og rétt tókst að stöðva hlauparann á teignum. Augnabliki síðar var Höjlund skipt út.

Gulu spjöldin

United sótti sér þrjú þarflaus gul spjöld í kvöld. Joshua Zirksee og Leny Yoro spörkuðu boltanum í burtu eftir að búið var að flauta. Masraoui hrinti Liam Delap, löngu eftir að búið var að dæma á Ipswich-manninn fyrir þrenn brot á Manuel Ugarte, sem gerði virkilega vel í að standa þau af sér. United hefur ekki efni á leikbönnum.

Evrópudeildin

Upphitun: FCSB – Manchester United

skrifaði þann | 22 ummæli

Embed from Getty Images

Eftir fjóra sigra í Evrópudeildinni í röð hefur hagur Manchester United vænkast verulega. Liðið er öruggt með að komast áfram en gæti enn lent í umspili með óhagstæðum úrslitum og þarf því stig annað kvöld gegn FCSB í Rúmeníu.

Hugleiðingar eftir Fulham?

Langskot, hefst upp í hornið sláin inn. Sannarlega glæsileg lýsing, þegar ekki er tekið fram að boltinn hafi farið í varnarmann og þaðan í furðulegan boga yfirmarkvörðinn sem náði ekki nógu mikilli snertingu til að blaka honum frá. En við þiggjum það sem er í boði er.

United verðskuldaði ekki sigur í hrútleiðinlegum leik gegn Fulham síðasta sunnudag. Það segir sitt að bæði lið voru með 0 í flokknum „stærr færi“ í tölfræðiforritum. Vissulega er gleðilegt að liðið hafi verið skipulagt og að mestu haldið aftur af Fulham en á móti kemur kemur að sóknin var jafn geld eins og hún hefur verið síðustu ár. Rasmus Höjlund var enn eina ferðina týndur frammi og heppnismark Lisandro Martinez skildi liðin að.

Janúarglugginn

United virðist hafa gengið frá kaupunum á Patrick Dorgu, örvfættum vængbakverði frá Lecce á Ítalíu. Dorgu, sem er danskur, mun væntanlegur til læknisskoðunar í Manchester á morgun. Kaupverðið mun vera 24 milljónir punda staðgreitt og fjórar síðar ef honum vegnar vel. Ekkert hefur komið fram enn um hvort United fjármagnar kaupin, hvort liðið geti lifað á yfirdrætti fram í júní og selt þá eða þurfi að selja strax.

Nærveru Marcusar Rashfords er klárlega ekki óskað. Ruben Amorim sagðist frekar setja inn á 63 ára markmannsþjálfarann heldur en leikmann sem ekki stæði sig á æfingum þegar hann var spurður um stöðu Rashfords eftir Fulham leikinn. Þjálfaranum virðist eins og Ingu Sæland ganga illa að hemja hvatvísina.

Rashford er áfram orðaður við ýmis lið en það virðast engar yfirgnæfandi líkur á sölu. Alejandro er áfram orðaður við Napoli og Chelsea, sem vilja nýta sér bága stöðu United til að fá Argentínumanninn á góðum díl. Það að hann hafi byrjað síðustu tvo leiki bendir til að Amorim vilji halda honum.

Tyrrell Malacia gæti verið lánaður eftir tilkomu Dorgu og smávegis áhugi virðist á Casemiro. United áfram orðað við sóknarmenn, helst Christopher Nkunku frá Chelsea á láni en líka Mathys Tel sem vill víst fara frá Bayern München. Tel er afar spennandi leikmaður en United á ekki krónu í hann án þess að selja Rashford eða Garnacho.

Liðsfréttir

Lið halda opna æfingu daginn fyrir Evrópuleiki. Í morgun sást til Luke Shaw á slíkri æfingu en hann er þó vart leikfær. Victor Lindelöf var þar líka og á meiri möguleika á að komast í hópinn. Manuel Ugarte virtist líka í ágætu standi en hann fór meiddur af velli á sunnudag.

Hvað er þetta FCSB?

FCSB er nýlegt nafn í Evrópuboltanum en félag með mikla sögu. Flest þekkjum við Steaua Búkarest sigursælasta lið Rúmeníu en það skipti um nafn árið 2017 eftir deilur. Liðið er nær eingöngu skipað rúmenskum leikmönnum, þar af fjórum sem eru í landsliðhópnum.

Liðinu hefur gengið ágætlega í Evrópudeildinni í vetur, mest þökk sé sterkum varnarleik því fyrir utan 4-0 tap gegn Rangers hefur liðið aðeins fengið á sig 3 mörk í 6 leikjum. Liðið hefur þó ekki lent í mörgum liðum úr efsta hluta töflunnar.

Hve mikilvægur er leikurinn United?

Þetta þýðir hins vegar að liðið er í áttunda sæti sem gefur sæti beint í 16 liða úrslitum fyrir leikinn á morgun. Þar er það með 14 stig en United er í fjórða sæti með 15 stig. Liðin í 9. – 12. sæti gætu öll náð United ef liðið tapar. Ósigur myndi ekki endilega fella liðið niður í umspilssætin (9. – 24.) en væri óþarfi. Jafntefli ætti að tryggja sæti meðal þeirra átta efstu. Engin ástæða er til annars en stefna hátt, United er eitt þriggja liða sem ekki hefur enn tapað í Evrópudeildinni.

Sigurvegari Evrópudeildarinnar kemst í Meistaradeildina á ári. Miðað við stöðu United í ensku úrvalsdeildinni virðist helsta vonin um Evrópusæti á ári vera sú leið eða að verja bikarinn.

Leikurinn hefst klukkan 20:00