Marcus Rashford verður frá í nokkrar vikur og Ole Gunnar Solskjær stillti upp varnarsinnuðu liði í dag
Varamenn: Romero, Bailly, Dalot, Jones, Mata, Lingard, Greenwood
Lið Liverpool var eins og spáð:
Fyrstu viðbrögð við liðinu voru að það yrðu þrír miðverðir og vakti það ekki mikla lukku en fljótlega var ljóst að Brandon Williams var hreinlega í kanthlutverkinu og átti að pressa á Alexander-Arnold. United stóð sig bara alveg þokkalega fyrstu 10 mínúturnar og pressaði á Liverpool og reyndi að finna glufur á vörninni til að stinga upp á Daniel James. Fyrstu 11 mínúturnar var liðið meira að segja 58% með boltann.
En Liverpool sótti á og fékk síðan horn. Það var alltof einfalt fyrir Van Dijk að stökkva hærra en Williams og Maguire og skora með góðum skalla. Williams var að reyna að vera í Van Dijk og stökk síðan ekki upp, Maguire sá hvað verða vildi og reyndi að koma í boltann en var of langt frá. Þetta er áttunda markið sem United fær á sig úr horni í vetur og það verður að teljast skelfileg tölfræði fyrir vörnina.
Annars náði Liverpool ekki að nýta þetta til að ná tökum á leiknum, United hélt áfram að reyna en gekk samt lítið. Um miðjan hálfleik náðu Liverpool skarpari sóknum, unnu horn og fleira og síðan skoraði Firmino en í aðdragandum hafði Van Dijk brotið á De Gea í loftinu og að sjálfsögð dæmdi VAR markið af, enda hafði Van Dijk ekki verið nálægt boltanum, og hefði ekki átt að þurfa VAR. Lindelöf hafði reyndar misst boltann klaufalega eftir brotið og má kallast heppinn enda hefði hann ella fengið alla sökina.
Annars fékk De Gea gult fyrir mótmæli enda fór öll United vörnin í dómarann eftir markið, eðlilega.
Liverpool spýtti í lófa eftir þetta og sótti enn á og Wijnaldum fékk frábæra stungusendingu og afgreiddi í netið en var rétt rangstæður.
Loksins á 41. mínútu kom frábær sókn, boltinn út hægra megin og Wan-Bissaka náði bara alveg fínni fyrirgjöf og allt í einu var það Andreas Pereira sem var fremstur, stakk sér fram en náði ekki almennilegri snertingu, ef það hefði gerst hefði boltinn farið beint inn, flott færi en sorglegt að sjá það ekki nýtt.
Pereira kom síðar nokkuð vel upp en í staðinn fyrir að reyna að gefa út á Wan-Bissaka reyndi hann langskot sem Alisson varði auðveldlega, Liverpool kom síðan upp í sókn og Mané var kominn innfyrir og það þurfti fótavinnu eins og De Gea gerir hana besta til að verja, þar hefði Liverpool átt að komast yfir.
En United komst inn í klefann aðeins eitt núll undir. Hefði getað verið verra en ekki samt allt alslæmt í fyrri hálfleik.
Liverpool kom út úr hálfleiknum miklu betri og Mo Salah átti að koma þeim í tvö núll innan tveggja mínútna þegar fyrirgjöf Mané fór framhjá Shaw og Salah á markteig átti að gera betur en að setja boltann framhjá. Tveimur mínútum síðan átti Henderson þrumuskot í stöng, og átti að gera betur enda var ekki nokkur varnarmaður fyrir framan hann.
Liverpool hélt áfram að halda stöðugri sókn og það kom ágætlega á óvart þegar Fred skeiðaði upp allan völlinn og var kominn óáreittur upp að teig, skotið hins vegar framhjá. Síðan átti Anthony Martial að skora. Hann gaf á Andreas utan við teiginn og Andreas vippað frábærlega inn á teiginn þar sem Martial var kominn framhjá öllum varnarmönnum og átti bara Alisson eftir en ákvað að negla boltanum hátt yfir. Skelfilegt skot hjá honum, skelfileg ákvarðanataka.
Þar sem United var farið að gera sig aðeins gildandi var aðeins spurning hvernig Liverpool myndi svara, í þetta skiptið var það skyndisókn þar sem Wijnaldum rústaði Maguire en á endanum var Mané ekki alveg nógu beittur uppi við markið.
Bæði Martial og Fred reyndu langskot, Alisson varði bæði, en United fékk þó horn eftir skot Fred. Fred var orðinn besti leikmaður United og sá sem var eitthvað að reyna að búa til.
Skipting hjá United kom loksins á 74. mínútu, Mata og Greenwood komu inná fyrir Pereira og Williams. Eftir þetta voru United bara hreinlega betra liðið, meira með boltann en náðu þó ekki upp alvöru ógn.
Lallana var búinn að koma inná fyrir Lallana og á 82. mínútu styrkti Klopp miðjuna með að setja Origi og Fabinho inná fyrir Mané og Firmino. Síðasta breyting United var hins vegar Dalot fyrir Shaw, þegar sá síðarnefndi var kominn með krampa.
United sótti án afláts síðustu mínúturnar og var búið að ná upp mikilli pressu á vörn Liverpool en þar var engar glufur að finna. Liverpool náði upp skyndisókn þar sem De Gea var á undan Salah í boltann og síðan annari þar sem Salah var alveg einn á miðlínu að taka við sendingu frá Alisson, Dan James reyndi sitt allra hraðasta og náði Salah en náði ekki að komast fyrir skotið sem fór undir De Gea og Liverpool innsiglaði sigurinn á síðustu sekúndu.
Það er ekki hægt að segja að Liverpool hafi ekki átt sigurinn skilinn, og að 2-0 hafi ekki verið sanngjörn úrslit. En það var nú samt svo að þegar United var að sækja á síðustu mínúturnar hefði liðið með smá heppni getað stolið jafntefli. Þegar keppt er við lið sem er 27 stigum á undan í upphafi leiks er varla hægt að biðja um meira á deginum en að hafa staðið í hinum.
Liverpool var augljóslega með betri einstaklinga og betra lið en einhvern veginn náðu þeir ekki að eiga leikinn eins og þeir hefðu kannske átt að gera. Of margir United leikmenn léku af sinni venjulegu slöku getu, og má þar nefna Luke Shaw, Victor Lindelöf og Andreas Pereira. Anthony Martial sýndi nákvæmlega það sem við erum farin að búast við af honum, stöku snilli en aðallega meðalmennsku og slaka ákvörðunartöku. Harry Maguire þarf nauðsynlega almennilegan miðvörð við hliðina á sér til að ná að stíga upp, vonir um að hann myndi gera Lindelöf betri eru gagnslausar. De Gea hefur aldrei farið almennilega út í teiginn og ætlar ekki að byrja á því en að halda því fram að það megi ryðja niður markmönnum án þess að fara í boltann bara af því að hann er ekki sá massífasti er firra.
En að því góða, Matic var þokkalegur á miðjunni og Fred átti einn sinn besta leik, þó vissulega sé hann ekki maðurinn til að taka skot á markið. Brandon Williams komst sömuleiðis skammlaust frá leiknum.
Þessi leikur sagði okkur ekkert nýtt, vandamálin eru enn þau sömu, og eru ekki auðleyst. Marcus Rashford verður frá í 2-3 mánuði með tvíbrákaðan hrygg og mun hafa spilað með eitt brot lengi. Hópurinn hefur þvi enn þynnst og að treysta yfirmönnunum til að kaupa, og það sem erfiðara er að kaupa rétt virðist næsta vonlaust!
Á morgun er síðasti möguleikinn á tímabilinu til að stöðva Liverpool í að fara taplaust í gegnum tímabilið, því ef United gerir það ekki, hver á þá að taka það að sér!
Eftir erfiða byrjun á árinu hýrnaði aðeins yfir okkar fólki á laugardaginn. Vissulega er Norwich lélegasta lið deildarinnar en það er nú samt alltaf betra að vinna fjögur núll en ekki. Í millitíðinni hefur slúðrið um að United og Sporting séu að ná saman um viðskipti með Bruno Fernandes þó að hér sé vissulega mjög svo ósopið kál á ferðinni.