Annað kvöld, á versta hugsanlega tíma fyrir Íslendinga í jólaundirbúningi og sérstaklega þau sem hanga á Laugaveginum á Þorláksmessu fer United til Leicester og tekst á við Englandsmeistarana frá því fyrir ári.
Þetta er fyrsti leikurinn í seinni umferðinni, United vann Leicester nokkuð örugglega í ágúst en Leicester hefur bara staðið sig þokkalega síðan og er í áttunda sæti, aðeins sex stóru og Burnley á undan þeim. Þeir voru búnir að vinna fimm leiki í röð í deild þegar Crystal Palace skellti þeim illa um síðustu helgi, 3-0. Varaliðið þeirra náði svo jafntefli gegn City í Carabao bikarnum á þriðjudaginn en tapaði í vítakeppni.
Leicester er því síður en svo fyrirfram unnið og ef United stendur sig jafn illa og á miðvikudaginn þá verða vandræði.
Fyrir utan miðjumennina er þarna enn kjarninn af meistaraliðinu og Ndidi hefur verið góður í vetur. Demarai Grey gæti komið inn þarna fyrir Okazaki en Grey var nálægt því að fá bann fyrir leikaraskap gegn City en leikarnefndin var ekki sammála um að svo hefði verið og Grey slapp. Að öðru leyti er lið Leicester nokkuð stöðugt enda ekki breiður hópur. Matty James og Robert Huth eru báðir meiddir
Manchester United
Það kom fram í dag að Matteo Darmian og Daley Blind ferðuðust ekki með liðinu og hvað þann fyrrnefnda varðar var það fagnaðarefni eftir hörmulega frammistöðu gegn Bristol City. Einnig kom fram að Antonio Valencia væri meiddur og því vona flest að nú fái Axel Tuanzebe loksins tækifæri. Annars er alveg eins líklegt að Mourinho hendi í þriggja manna vörn nú eða seti Lindelöf í bakvörðinn.
Rashford og Martial saman tilraunin verður ekki endurtekin en þetta er sterkt lið. Spurning samt hvort Mourinho hefur leikjaálagið framundan í huga og setur inn einn eða tvo til að rótera. Þó á pappír séu Burnley og Southampton heima og Everton úti ekki það erfiðasta sem hægt er að hugsa sér flokkast þeir allir sem strembnir.
Leikurinn á morgun er kl 19:45 eða um það leyti sem jólatrésskreytingar eða Laugavegsrölt eiga hug og hjörtu þjóðarinnar og verður áhugavert að vita hvort þetta setur strik í áhorf hér heima!
Auðunn says
Verður mjög erfiður leikur og United þarf að stíga rækilega upp ætli þeir að taka 3 stig með sér til Manchester.
Vona að Young verði hægra megin og Shaw vinstra megin.
Shaw á skilið að vera áfram í liðinu enda búinn að vera með betri mönnum liðsins þegar hann hefur spilað.
Bjarni says
Sammála með Shaw, hann sækir þó fram á við sem er plús. Er hræddur við vörnina okkar, þar eru misjafnir sauðir og oftar en ekki hefur de gea bjargað okkur fyrir horn eftir lélegan varnarleik. Býst fastlega við áframhaldandi spilamennsku því hún virðist þó skila okkur stigum en hraði sóknarmanna Leicester mun valda vörninni töluverðum vandræðum. 1-2 fyrir okkur er mín ósk svo ég geti haldið gleðileg jól.