Liðið sem átti að reyna að bæta fyrir frammistöðuna gegn Everton leit svona út
De Gea
Rafael Vidic Evans Evra
Nani Cleverley Jones Januzaj
Hernandez Van Persie
Varamenn: Lindegaard, Ferdinand, Anderson, Valencia, Young, Zaha, Welbeck
Eftir nokkuð varfærna byrjun fór sókndjörf uppstillingin að segja til sín og United náði upp nokkrum nettum sóknum. Það hjálpaði ef til vill að Yohan Cabaye sem byrjaði leikinn mjög fyrirferðarmikill á miðjunni fékk gult spjald áður en tíu mínútur voru liðnar. Nani og Januzaj voru nokkuð nettir en þegar Newcastle fékk boltann áttu þeir frekar auðvelt með að halda honum, lítil pressa á þá á miðjunni frá Jones og Cleverley. Jones tók sig þó á og var farinn að tækla grimmúðlega út um alla miðju. Þó ekki jafn oft og stíft og Newcastle sem sannarlega létu finna fyrir sér.
Debuchy fékk bestu færi hálfleiksins undir lokin þegar hann fékk fyrst sendingu í gegn en David De Gea varði auðvitað skot hans. Vel gert hjá De Gea, færið reyndar þröngt. De Gea varði svo skalla frá Debuchy á síðustu sekúndum hálfleiksins.
Bestu menn United í hálfleiknum voru Januzaj og Hernandez. Ekki nógu mikið að koma úr miðjunni og Van Persie var varla inni í leiknum, spilaði fyrir aftan Chicharito og hafði lítil áhrif á leikinn.
Í upphafi seinni hálfleiks kom Van Persie samt með prýðilega langa sendingu inn á Chicharito sem hitti á Krul þannig að ekkert varð úr því. Næstu mínúturnar á eftir gerði United harða hríð að marki Newcastle, hefðu getað fengið víti þegar boltinn fór í hendi Anita eftir skalla Evra eftir horn. Önnur færi í þessari hrinu voru þó ekki nema hálffæri. Newcastle hefur hins vegar verið að skora úr hraðaupphlaupum í vetur og settu hann úr einu slíku eftir klukkutíma leik. Sissoko komst framhjá Evra eftir að skalli Evra fór í hann, fór uppað teig gaf út á Cabaye og skot hans fór í Vidic og rétt framhjá hendi de Gea.
Þar með var þetta eiginlega búið. Moyes reyndi að breyta einhverju með að senda inn Zaha fyrir Nani, Anderson fyrir Cleverley og loks Valencia fyrir Rafael. Allt kom fyrir ekki, það varð engin barátta og ekki neitt. Van Persie reyndar skallaði í netið en var rangstæður
Hrun liðsins heldur áfram. Það koma þrír leikmenn út úr þessum leik með eitthvað kredit, Januzaj, Chicharito og de Gea, restin var á hælunum.
Það er fyrst og fremst augljóst í þessum leik að við eigum ekki séns á miðjunni. Newcastle var að spila gríðarlega vel, mikil pressa og þrír á miðjunni sem voru gersamlega með öll tök. Eina skiptið sem eitthvað gerðist hjá okkur var þegar menn fóru upp kantana, miðjan gaf ekkert.
Burtséð frá allri umræðu um þjálfarann þá hljótum við að skoða hversu skelfilegt það er að vera með einn almennilegan miðjumann og hrynja gjörsamlega þegar hann er ekki með. Fjárfestingarleysi síðustu ár er núna loksins að koma gríðarlega í bakið á okkur og ekki hjálpaði skelfilegt kaupasumar. Þegar við erum með Carrick á miðjunni, Rooney og Van Persie alla góða, þá höfum við átt séns. Án þeirra er þetta ekki neitt neitt.
En hvað svo sem líður þeirri skoðun minni að Moyes eigi að fá tíma, og að eigendurnir hafi ætlað honum tíma, þá er samt ekki hægt að horfa framhjá því að svona spilamennska og frammistaða mun á endanum setja of mikla pressu á eigendurnar. Það er líka þannig að ef reka á stjóra þarf að ráða stjóra. Og jafnvel þó ég vildi reka Moyes, sé ég ekki hvar við eigum að fá almennilegan stjóra.
Að lokum er rétt að benda á eitt ljós í myrkrinu. Það er ólíklegt að við föllum, en það hefur hins vegar einu meistaraliði tekist. Hvaða liði? Jú, hverjum öðrum en okkar ástkæru grönnum, Manchester City.