Í kvöld tók Manchester United á móti Brentford á Old Trafford en það var einmitt eftir 4-0 ósigur gegn þeim í 2. umferð deildarinnar sem Erik ten Hag lét menn hlaupa 13,4km eins og frægt er orðið. Erik ten Hag stillti loks upp liðinu án Wout Weghorst en Martial var þó ekki í byrjunarliðinu.
Leikurinn var gífurlega mikilvægur sérstaklega í ljósi þess að Newcastle United fór með sigur af hólmi um helgina og jafnaði okkur að stigum en þeir eru með talsvert betri markatölu en við. Newcastle gerði sér lítið fyrir og slátraði West Ham á sama tíma og United marði Brentford. Góðu fréttirnar eru þær að Martial er að verða leikfær og liðið spilar margfalt betur með hann í fremstu línu og Rashford á vinstri kantinum en slæmu fréttirnar eru þær að Luke Shaw fór meiddur af velli eftir hálftíma leik.
Leikurinn var talsvert betri en leikurinn gegn Newcastle um helgina en fyrstu 15-20 mínúturnar áttu heimamenn með húð og hári. Brentford komst varla yfir miðju og yfirburði United voru gríðarlegir en þó gekk illa að skapa hættuleg færi. United tók þó loksins forystuna eftir 27 mínútna leik eftir eina af fjölmörgum hornspyrnum United í fyrri hálfleik. Brentford, sem eru nú þekktir fyrir að vera sterkir í föstum leikatriðum, náðu ekki að hreinsa langt út úr teignum en ýttu línunni hátt upp á sama tíma og boltanum var vippað yfir varnarlínuna.
Marcel Sabitzer var fljótur að átta sig á aðstæðum og gerði árás á markið og tókst að vera fyrstur á boltann og skallaði hann þægilega fyrir fætur Rashford sem hafði orðið eftir í rangstöðunni en tókst að komast fyrir aftan Austurríkismanninn áður en hann kom við boltann. Rashford kontraði boltann auðveldlega framhjá David Raya í markinu og skoraði eina mark leiksins.
Allan leikinn virkaði United hafa ágætis tök á leiknum og sigurinn var aldrei í hættu. Það var ekki fyrr en eftir klukkustundarleik að Brentford fóru að sækja af einhverjum krafti og féll þeirra besta færi í skaut Þjóðverjans Shade sem kom inn á sem varamaður. Ivan Toney átti þá fallega hælsendingu og Shade potaði boltanum inn fyrir varnarlínuna í fyrsta, framhjá Varane og komst einn á móti markmanni en David de Gea var vel á verðinum, kom fljótt út á móti og lokaði á hann. Raunar fór skotið beint í de Gea sem svo lenti í samstuði við sóknarmanninn og lá óvígur eftir en gat þó haldið leik áfram.
Eftir að Fred og Martial komu inn á virtist flæðið í sókninni verða mun betra. United skapaði sér helling af hálffærum en náði þó ekki að nýta sér þau og því urðu síðustu mínúturnar óþægilega taugaveiklaðar en Brentford virtust ekki vera á þeim buxunum að leggja mikið á sig til að jafna svo 1-0 sigur var þægileg staðreynd.
United á næst hádegisleik við Everton á laugardaginn en Everton gerðu okkur einmitt greiða með því að stela stigum af Tottenham á mánudaginn. En United verður að sækja þrjú stig úr þeim leik því Tottenham mætir Brighton og Brentford tekur á móti Newcastle í sömu umferð og því bókað mál að einhver lið í kringum okkur í töflunni tapi stigum.
Einar says
Þrjú stig en ekki var liðið sannfærandi.