Úfff, þetta voru svo sannarlega svekkjandi úrslit svo ekki sé meira sagt. Tottenham sækir annan sigur sinn í röð á Old Trafford, eitthvað sem hefur ekki gerst síðan 1989. Förum aðeins yfir þetta, byrjum á liðinu:
De Gea
Smalling Vidic Evans Evra
Carrick Cleverley
Valencia Rooney Januzaj
Welbeck
Varamenn: Lindegaard, Büttner, Ferdinand, Fletcher, Kagawa, Young, Hernandez.
Leikurinn byrjaði af miklum krafti af hálfu United, liðið spilaði að manni fannst 4-4-1-1, mjög hátt á vellinum, voru grimmir í pressunni og héldu boltanum vel. Welbeck var sprækur frammi og miðjan öll að gera bara fína hluti. Valencia var sérstaklega sprækur, með Rose gjörsamlega í vasanum og krossaði boltanum trekk í trekk, eitthvað sem hefur varla sést í allan vetur. Þrátt fyrir alla þessa krossa þá náði United ekki að skapa sér nein hættuleg færi, maður var alltaf að bíða eftir því að boltinn rataði á einhvern United mann sem myndi hamra honum í netið, en í staðinn fóru allir boltar í lappirnar á varnarmönnum Tottenham. Þetta tíst segir í raun allt sem segja þarf:
Manchester United crossed the ball 29 times in the first half – only 4 were accurate #MUFC
— EPL Stat Man (@EPLStatman) January 1, 2014
Það sem maður óttast mest þegar liðið spilar góðan sóknarbolta eru skyndisóknir andstæðinganna. Tottenham náðu þremur mjög hættulegum skyndisóknum í fyrri hálfleik. Allar þessar sóknir áttu það sameiginlegt að þær komu upp hægri kantinn þar sem Lennon var í fullri vinnu við að salta Evra í tunnur. Í einum af þessum sóknum kom fyrsta mark Tottenham-manna. Eriksen fékk boltann á hægri kantinum, gaf fyrir og þar var Adebayor nánast einn og óvaldaður (Smalling stóð nú reyndar hjá honum svona til gamans) og skallaði í fjærhornið. Enn er óljóst hvar Evra var í aðdraganda marksins þar sem hann náðist aldrei á mynd. Þar við sat í hálfleik, fín spilamennska hjá United er 1-0 undir. Er það ekki svolítið týpískt?
Tempóið í seinni hálfleik var ekki alveg jafn hátt og í þeim fyrri. Tottenham datt aðeins aftar á völlinn og United reyndi með þolinmæði að byggja upp sóknir. Á 60 mínútu, þegar ekkert markvert hafði gerst, gerði Moyes tvær sókndjarfar breytingar á liðinu. Kagawa og Hernandez komu inn fyrir Smalling og Carrick. Ég skildi ekki alveg þessa skiptingu, Valencia var að gera ágæta hluti á kantinum, en hefur á sama tíma ekki sýnt glæsilega tilburði í hægri bakverðinum á þessu tímabili, ég varð því smá stressaður yfir þessari hrókeríngu. Ótti minn var svo staðfestur stuttu seinna þegar Tottenham-menn hnoða boltanum inn í teig þar sem Eriksen kemur og „flugskallar“ boltann í netið. Markið verður, því miður, að skrifast á FÁRÁNLEGA slaka varnarvinnu hjá Valencia sem stóð rólegur inn í teig og beð eftir að fá boltann í lappirnar, á sama tíma og alvöru bakvörður hefði mætt boltanum og nelgt honum eins langt í burtu og hægt var.
Á þessum tímapunkti var ég við það að tryllast, en sem betur fer þá aðeins mínútu seinna fær Welbeck fær boltann inn fyrir vörn Tottenham og minnkar muninn. Jæja, smá von hérna! Tottenham gerðu um leið tvær varnarsinnaðar skiptingar og ætluðu sér klárlega að halda forustunni. United pressaði stíft og gaf allt í að reyna að jafna leikinn, áttu til að mynda nokkur dauðafæri á síðustu mínútunum en enn of aftur er eins og heppnin væri ekki með okkar mönnum. Boltar skoppa asnalega, menn renna til, bjargað á línu, augljósar aukaspyrnur ekki gefnar, og svo framvegis. Tottenham héldu því sínum hlut og enn eitt tapið í vetur á Old Trafford staðreynd, sem er svo svekkjandi því ef United hefur einhvern tímann spilað “6 stiga leik” á þessu tímabili þá var það í dag.
Ég nenni ekki að fara að velta mér upp úr einhverjum niðurdrepandi punktum, svona eins og myndinni hér að ofan, spilamennsku sumra leikmanna og frammistöðu dómarans svo dæmi sé tekið. Það verður bara að kyngja þessu og halda áfram, fókusa á leikina tvo sem eru framundan gegn Swansea bæði í bikar og deild. Ef við spilum gegn þeim eins og við gerðum í dag (vorum með boltann 61% af leiknum) þá er ég frekar bjartsýnn, sérstaklega ef heppnin fer að detta aðeins með okkur líka!
Enn einn stöngin-út leikur á þessu stöngin-út tímabili #Djöflarnir
— Tryggvi Páll (@tryggvipall) January 1, 2014