Rauðu djöflarnir

Enska úrvalsdeildin

Amad, Zirksee og Rashford á eldi gegn Everton

skrifaði þann | 1 ummæli

Embed from Getty Images

Desember byrjar vel hjá Manchester United eftir 4-0 sigur á Everton á heimavelli í dag. Marcus Rashford og Joshua Zirksee skoruðu tvö mörk hvor í fyrsta deildarleik liðsins á Old Trafford undir stjórn Ruben Amorim.

Hvað breyttist í liðsvalinu?

Amorim hélt áfram að gera tilraunir með uppstillingu liðsins. Vörnin var óbreytt með Amad Diallo og Diego Dalot sem vængbakverði en Noussair Mazraoui, Mathijs de Ligt og Lisandro Martinez sem miðverði fyrir framan André Onana.

Casemiro og Kobbie Mainoo, sem fékk sitt fyrsta tækifæri undir Amorim, komu inn á miðjuna. Manuel Ugarte fór á bekkinn og Bruno Fernandez aftur fram í sína venjulegu stöðu fyrir aftan framherjann, sem var að þessu sinni Marcus Rashford. Nokkuð óvænt, eftir góða leiki síðustu vikur, var Alejandro Garnacho settur á bekkinn í stað Joshua Zirksee. Mason Mount datt líka úr liðinu.

Mörkin

Bæði lið komust í vænlegar stöður, frekar en opin færi, eftir stungusendingar áður en Marcus Rashford skoraði á 34. mínútu. Bruno Fernandes tók horn út í teiginn fjær þar sem Rashford mætti og skaut. Hann munaði um hjálp Jarrad Branthwaite sem renndi sér í boltann og stýrði honum inn. Það má fara betur yfir það síðar hversu mikið föst leikatriði United hafa batnað og þann fjölda marka sem það hefur þegar skilað á leiktíðinni.

Braintwaite, sem United reyndi að kaupa í sumar, gerði ekkert til að réttlæta 70 milljóna punda verðlagningu Everton á sér. Á 41. mínútu hirti Amad af honum boltann, kom á Bruno sem hafði nokkra kosti en sendi boltann þvert í teignum þar sem Zirksee var ákveðnari en tveir varnarmenn Everton og kom boltanum inn.

Þriðja markið kom strax eftir 20 sekúndur í seinni hálfleik. Casemiro vann boltann á miðjunni, hann barst í gegnum Zirksee upp til Amad sem losaði sig við varnarmenn Everton, renndi boltanum inn á Rashford sem kláraði færið.

Eftir þetta slakaði United heldur á, meira að segja fullmikið í fyrstu og fékk á sig tvö gul spjöld, á Mainoo og Martinez sem báðir missa af leiknum gegn Arsenal. Amorim fór líka að skipta inn á, trúlega með næstu leiki í huga. Síðasta markið kom á 64. Mínútu eftir að Amad pressaði boltann af miðverði Everton, og renndi honum á Zirksee sem kláraði auðvelt færi.

Þetta er allt að koma

Slagorð sem gagnaðist Framsóknarflokknum takmarkað, en á við stöðuna á leikmannahópi United. Harry Maguire spilaði 40 mínútur í dag og biðin styttist í Leny Yoro með hverjum deginum. Gallinn er að Martinez hafi krækt sér í leikbann. Líklegt virðist að Luke Shaw, sem kom inn um leið og Maguire, fái traustið vinstra megin í vikunni.

Ó þá náð að eiga Amad

Hann er eiginlega búinn að vera framúrskarandi síðan hann skoraði sigurmarkið gegn Liverpool í bikarnum í vor. Hann fór illa með varnarmenn Everton í dag, pressaði af þeim boltann eða skildi þá eftir í reyknum. Tvær stoðsendingar segja sína sögu um að hann tekur skynsamlegar ákvarðanir með boltann.

Halló Rashford!

Árið í fyrra var slæmt en hann hefur kannski ekki alveg notið sannmælis, 5 mörk og 3 stoðsendingar í 20 leikjum, fyrir daginn í dag, er engin hörmung. En hann er kominn með 3 mörk í 2 deildarleikjum hjá nýjum þjálfara. Mörkin voru tvö í dag og hann var líflegur með hlaupum og hraða.

Samkeppni innan hóps

Ruben Amorim hefur verið duglegur að hræra í liðinu, einkum sóknarlínunni fyrstu leikina. Það er í lagi því honum virðist vera að takast að skapa þá samkeppni sem þarf þannig allir séu á tánum þegar þeir fá tækifæri. Það hjálpar að hafa alla heila þannig menn þurfi virkilega að leggja sig fram til að fá að vera með aftur.

Þú líka, Zirksee

Talandi um samkeppni, þá var Joshua Zirksee flottur í dag, framherjinn sem ekki hafið skorað síðan á fyrsta leikdegi. Hann var fyrir aftan Rashford í dag og átti skínandi leik. Fyrir utan mörkin tvö þá sýndi hann sem talað var um þegar hann var keyptur í sumar, að þarna væri öðruvísi framherji með hæfileika til að tengja vel saman spil. Zirksee virtist hafa góða yfirsýn og fann samherja, einkum Amad, oft í góðum svæðum eins og þriðja markið var dæmi um.

Hvað þýða úrslitin?

Everton hafði verið á ágætu skriði síðustu vikur og sérstaklega varist vel. Það er því ánægjulegt að hafa brotið það sannfærandi niður, seinni hálfleikurinn í dag var vel spilaður. Það verður samt að halda fólki áfram á jörðinni, xG hlutfallið var ekki nema 0,73 gegn 0,65.

United færist með sigrinum upp í efri helming deildarinnar, í fyrsta sinn í alltof langan tíma. Liðið er með 9. Sæti, jafnt Newcastle og Aston Villa að stigum en með besta markahlutfallið. Stigi fyrir ofan eru Brentford og Tottenham auk þess sem ekki þarf nema eina umferð til að ná Nottingham Forest. En það er líka jafnstutt niður í Bournemouth 13. sæti.

Hvað næst?

Desember er mánuður hinna mörgu leikja og United spilar á miðvikudagskvöld útileik gegn Arsenal en Nottingham Forest mætir á Old Trafford næsta laugardag.

Enska úrvalsdeildinEnska úrvalsdeildin

Fyrsti heimaleikur Amorims í deild gegn Everton

skrifaði þann | Engin ummæli

Embed from Getty Images


Ruben Amorim stýrir Manchester United í fyrsta sinn á heimavelli í ensku úrvalsdeildinni þegar United tekur á móti Everton á morgun, 1. desember. Hann vonast eftir til að fylgja eftir sigrinum á Bodo/Glimt á fimmtudag og fá fleiri leikmenn úr meiðslum.

Amorim heldur sennilega áfram að leita að væntanlegu byrjunarliði sínu á morgun. Það er barist um ýmsar stöður. Höjlund gerir væntanlega áfram tilkall til framherjastöðunnar og Alejandro Garnacho hefur verið sannfærandi fyrir aftan hann, en Marcus Rashford, Masoun Mount og jafnvel Amad Diallo eða Bruno Fernandes berjast um næstu stöðu. Bruno og Ugarte gætu haldið áfram aftar á miðjunni, en Kobbie Mainoo bíður enn eftir sínu fyrsta tækifæri hjá Portúgalanum.

Amorim hefur líka gert tilraunir með kantbakverðina, Amad stóð sig vel þar gegn Ipswich fyrir viku og átti góða innkomu gegn norska liðinu. Tyrrell Malacia nýtti ekki tækifærið vinstra megin á fimmtudag þannig líklegt er að Diego Dalot haldi henni. Antony byrjaði hægra megin á fimmtudag en fór út af meið einhver meiðsli.

Luke Shaw hefur komið inn sem miðvörður vinstra megin í fyrstu tveimur leikjunum en Lisandro Martinez byrjaði þar í vikunni. Noussair Mazraoui hefur verið virkilega góður hægra megin. Casemiro lauk leiknum í miðri vörninni á fimmtudag, en hann kann betur við sig á miðjunni. Mathijs de Ligt verður væntanlega þar áfram. Líklega sömu miðverðir og í Evrópudeildinni.

Victor Lindelöf, Harry Maguire, Johnny Evans og Leny Yoro hafa allir verið frá vegna meiðsla. Þeir gætu farið að koma aftur inn í hópinn.

Í liði Everton er gamli James Garner fjarri vegna meiðsla. Fleiri leikmenn eins og Seamus Coleman, Youssef Chermiti og Tim Iroegbunam eru meidir. Chermiti spilaði áður hjá Sporting Lissabon undir stjórn Amorims.

Leikurinn hefst klukkan 13:30.

 

Evrópudeildin

Höjlund hetjan í fyrsta sigri Amorims

skrifaði þann | 1 ummæli

Embed from Getty Images

Rasmus Höjlund var lykilmaður í öllum mörkum Manchester United þegar liðið vann Bodø/Glimt 3-2 í Evrópudeildinni í kvöld. Þetta var fyrsti leikur United á Old Trafford undir stjórn Ruben Amorim.

Amorim þarf að nota fyrstu leiki sína til að skoða leikmenn, prófa þá í mismunandi stöðum og finna út sitt besta lið. Hann nýtti því eðlilega tækifærið gegn Bodø/Glimt í kvöld. Sex nýir leikmenn komu inn í byrjunarliðið miðað við Ipswich. Lisandro Martinez sem vinstri miðvörður í stað Jonny Evans, sem er meiddur. Tyrrell Malacia lék sinn fyrsta leik í 550 daga og byrjaði sem vinstri kantbakvörður í stað Digeo Dalot. Antony sem hægri kantbakvörður í stað Amad, Rasmus Höjlund fram í stað Rashford og Manuel Ugarte inn á miðjuna í stað Casemiro. Mason Mount fékk líka tækifæri á kostnað Christians Eriksen. Mount spilaði sem sóknartengilliður en Bruno Fernandes var færður aftar á miðjuna með Ugarte.

Leikurinn byrjaði nógu glæsilega með marki United eftir slétta mínútu. Höjlund elti sendingu til baka á markvörð Bodø/Glimt, sem í stað þess að þruma boltanum strax fram ákvað að reyna að leika honum. Nema Höjlund var fljótari og náði að koma boltanum frá markverðinum, sem greip um Danan og reyndi að halda honum. Það varð til þess að Höjlund skoraði ekki held mætti Alejandro Garnacho á svæðið og skoraði.

En United fylgdi þessu ekki. Bodø/Glimt stillti oft upp í góða pressu og leikmenn United áttu erfitt með að koma boltanum sín á milli. Eftir slakar hreinsanir Malacia og De Ligt unnu gestirnir boltann aftur á miðjunni, komu honum inn á teiginn vinstra megin og þaðan út aftur þar sem Hakon Evjen mætti og sendi boltann upp vinkill. Þar með var staðan orðin jöfn á 19. mínútu.

Fjórum mínútum síðar ákvað Martinez að hlaupa upp úr vörninni til að mæta hægri bakverði Bodø/Glimt. Sá fékk ekki boltann, heldur kom löng sending af miðjunni upp á hægri kantinn. Þar var Philip Zinckernagel kominn í maður á mann stöðu gegn Malacia og einfaldlega stakk af. De Ligt var of langt frá og Martinez í skógarferð og Zinckernagel negldi boltanum undir Onana.

Glæsilegt jöfnunarmark

Eftir þetta tók United völdin á vellinum. Liðinu gekk betur en undanfarna mánuði að koma boltanum upp völlin og inn á teig. Það skilaði ekki dauðafærum en nokkrum fínum skotfærum og vænlegum stöðum. United liðið náði líka að stíga upp og vinna boltann framarlega á vellinum.

Þannig kom jöfnunarmarkið. Bodø/Glimt hafði reynt að hreinsa fram en United náði strax á miðjunni, boltinn barst til Noussair Mazraoui sem lék aðeins áfram, áður en hann lyfti boltanum í átt að Höjlund, sem tók á móti honum með vinstri áður en hann smellti honum viðstöðulaust í fjærhornið með hægri.

Alltaf yfir en aldrei öruggt

United komst síðan yfir á 50. mínútu. United spilaði sig inn á teiginn hægra megin, nett snerting Mount losaði um Ugarte sem sendi boltann þvert fyrir markið þar sem Höjlund var í hárfínni línu við miðvörðinn og potaði boltanum í markið.

United hélt þessari stöðu og tökum á leiknum, þótt það sigldi alls ekki lygnan sjó. Bodø/Glimt komst 2-3 í góða stöðu, Onana slapp þótt boltinn færi í hendina á honum utan teigs og hjartsláttur United-fólks róaðist ekki fyrr en á annarri mínútu uppbótartíma, þegar búið var að hreinsa eftir aukaspyrnu sem gestirnir fengu við vítateiginn og áttu gott skot úr. United fékk þó fleiri vænlegar stöður en besta færið var trúlega skot í þverslá frá Mount.

Amorim hélt áfram að prófa sig áfram með liðið. Casemiro kom til dæmis inn í vörnina í stað de Ligt og Luke Shaw fyrir Martinez. Marcus Rashford skipti við Mount og ógnaði ágætlega með hraða sínum í þeirri stöðu. Amad var einnig góður sem hægri kantbakvörður.

Góði Malacia, lélegi Malacia

Eftir að hafa verið frá í eitt og hálft ár var viðbúið að Malacia væri ryðgaður. Hann var það varnarlega, bæði mörkin máttu að einhverju leyti rekja til hans. En sóknarlega var mikill munur að fá örvfættan bakvörð og Malacia stóð sig vel þar. Hann breikkaði völlinn og kom sér í fínar fyrirgjafarstöður uppi í horninu. Diego Dalot skipti við hann í hálfleik. Það þétti vörnina, en sóknarlega hefði mögulega verið betra að hafa Dalot hægra megin og færa Antony yfir til vinstri.

Boltanum loksins komið á Höjlund

Sú saga gekk í fyrra að ákveðnir leikmenn United vildu helst ekki senda boltann á Danann. Í kvöld var frekar leitað að honum með góðum árangri, það er að segja tveimur mörkum. Amorim virtist leggja upp með að koma boltanum upp kantana og fá fyrirgjafir, sem Höjlund þakkaði fyrir. Þetta eru jákvæð teikn.

Takk fyrir Mazraoui

Mazraoui hefur virkilega smollið inn í United liðið. Hann er traustur varnarmaður og frábær með boltann. Tölfræði hans í kvöld sýnir þetta 6/7 návígum unnin, 5 tæklingar og 114/120 sendingum á samherja, þar af ein stoðsending.

Ugarte hlýtur að vera orðinn byrjunarliðsmaður

Ugarte byrjaði á bekknum gegn Ipswich, eftir að hafa fest sig í sessi á stuttri stjóratíð Ruud van Nistelrooy. Hann hlýtur að halda sætinu núna. Tölfræðin er svipuð og hjá Mazraoui, 5/7 návígum unnin, 4 tæklingar, 3 lesnar sendingar og 90/95 sendingum á samherja, auk stoðsendingar.

Hvað gerir Amorim næst?

Það hlýtur að koma að því að hann byrji með örvfættan kantbakvörð vinstra megin og réttfættan hægra megin, þeir þurfa minna pláss til að koma boltanum fyrir. Kobbie Mainoo hefur ekki fengið tækifæri þessa fyrstu tvo leiki og miðað við frammistöðuna í kvöld verður samkeppnin hörð. Höjlund hlýtur líkt og Ugarte að hafa tryggt sæti sitt. Garnacho var öflugur en Rashford og Mount gætu átt eftir að berjast um sæti. United var viljugra en oft áður í að spila sig upp í hornin og inn á teig heldur en undanfarna mánuði. Það ætti að vita á gott. En óöryggið í vörninni er enn til staðar og sérstaklega síðasta kortérið sýndi Bodø/Glimt að leikurinn væri ekki búinn.

Hvað þýða úrslitin?

United er komið í 12. sæti Evrópudeildarinnar með 9 stig eftir tvo sigra í röð. Tvö stig eru upp í fjórða sætið, sem þýðir að ef liðið heldur áfram á þessari braut á það vel að geta komist í hóp átta efstu liðanna, sem eru þau sem fara beint í útsláttarkeppnina. Næsti leikur er 12. desember í Tékklandi gegn Viktoria Plzen, sem er með sama árangur og United: tvo sigra og þrjú jafntefli sem þýða 9 stig.

 

 

Evrópudeildin

Önnur þraut Amorimos: Bodø/Glimt

skrifaði þann | 1 ummæli

Embed from Getty Images

Ruben Amorim stýrir Manchester United í fyrsta sinn á Old Trafford þegar liðið tekur á móti Noregsmeisturum Bodø/Glimt í Evrópudeildinni annað kvöld. Ekki eru teljandi breytingar á þeim leikmönnum sem Portúgalinn hefur að spila frá því um helgina.

Lisandro Martinez er heill en Jonny Evans tók ekki þátt í æfingunni í dag. Hann er tæpur. Aðrir miðverðir virðast heldur ekki tilbúnir. Hinn ungi Godwill Kukonki fékk að æfa með, en hann tók líka þátt í fyrstu æfingum Amorims í síðustu viku.

Amorim valdi að láta þá leikmenn byrja, í 1-1 jafnteflinu gegn Ipswich á sunnudag, sem hann hafði haft mestan tíma til að vinna með. Það gefur til kynna að eftir því sem líður á muni verða meiri breytingar á liðinu.

Hann mun væntanlega leita svara við spurningu eins og hverjir henti sem kantbakverðir og hver eigi að byrja frammi. Marcus Rashford var þar á sunnudag en var ósýnilegur eftir að hann skoraði. Kobbie Mainoo sat líka á bekknum allan þann leik þótt miðja United væri ekki að gera neinar rósir.

Hvað er þetta Bodø/Glimt?

Norsku mótherjarnir eru áhugaverðir. Liðið fór upp í norsku úrvalsdeildina haustið 2017, vann hana eftir að hafa fallið, hélt sér í henni 2018 en hefur síðan verið besta lið Noregs. Bodø/Glimt varð Noregsmeistari 2020, 2021 og í fyrra og hefur verið áskrifandi að riðlakeppnum í Evrópu, ýmist í Evrópudeild eða Sambandsdeildinni og jafnvel komist í útsláttarkeppni. Besti árangurinn var fjórðungsúrslit í Sambandsdeildinni 2022 þar sem liðið vann fyrri leikinn gegn Roma en tapaði síðan illa. Vert er að geta þess að Kjetil Knudsen hefur verið aðalþjálfari liðsins frá 2018.

Það sem af er vetri hefur liðið farið ágætlega af stað, unnið tvo leiki, þar af annan gegn Porto sem United gerði jafntefli við og gert eitt jafntefli en tapað einum. Þá er liðið efst í norsku deildinni og mætir Lilleström, sem er fallið í lokaumferðinni um helgina. Sögusagnir eru um að Bodø/Glimt muni hvíla leikmenn á morgun til að hafa þá klára til að tryggja titilinn.

Af áhugaverðum leikmönnum er vert að benda á Jens Petter Hauge, sem hefur skorað þrjú af 20 mörkum liðsins í Evrópukeppnum í ár en markaskorunin hefur annars dreifst nokkuð vel. Jens Petter er vængmaður sem ólst upp hjá Bodø/Glimt og var með liðinu í upphafi þessarar gullaldar, en fór síðan til AC Milan og þaðan Frankfurt áður en hann kom heim að láni í byrjun árs. Þá er vert að benda á Danann Kasper Høhg sem spilaði fimm leiki með Val sumarið 2020.

Leikurinn hefst klukkan 20:00 og er í beinni á Stöð 2 Sport 3.