Rauðu djöflarnir

Enska úrvalsdeildin

Hvað bíður tímabilið 2025-26?

skrifaði þann | 4 ummæli

Embed from Getty Images

Það er að koma að því – enska úrvalsdeildin tímabilið 2025/26 er að hefjast. Eins og oftast í ágúst er bjartsýnin við völd, hjá hverjum sem er. Rauðu djöflarnir settust á rökstóla og rýndu í sumarið og það er framundan er.

Björn Friðgeir Björnsson

1. Hvað væri ásættanlegur árangur í vetur í þínum huga? 5. – 7. sæti. Fjórða ef Baleba kemur.
2. Hvar mun United enda í deildinni? Sjötta. Fjórða ef Baleba og Donnarumma koma.
3. Hver nýju mannanna á eftir að standa sig best? Ég hef hlutfallslega mestar væntingar til Diego Leon. En annars Mbeumo.
4. Hvaða leikmaður mun koma okkur mest á óvart/sýna mestu framfarirnar? Ayden Heaven
5. Hvaða lið verður enskur meistari? Manchester City
6. Hver verður fyrsti þjálfarinn til að verða rekinn? Hvað heitir aftur sá sem þjálfar Sunderland?
7. Hvaða lið kemur mest á óvart? Það verða engin spútniklið í ár. Milligóðu liðin hafa öll misst lykilmenn. Kannski kallast það að koma á óvart ef eitthvert nýju liðanna fellur ekki? En ég sé ekki að það gerist.
8. Hvaða lið veldur mestum vonbrigðum? Myndi það flokkast undir vonbrigði ef Liverpool lendir í þriðja sæti eða neðar? Líklega.

Embed from Getty Images

Hrólfur Eyjólfsson

1. Hvað væri ásættanlegur árangur í vetur í þínum huga? Að vera meðal efstu 5. Að ná í bikar væri gaman.
2. Hvar mun United enda í deildinni? Grátlega nærri þriðja sætinu. Einn fáránlegur leikur mun kosta okkur það.
3. Hver nýju mannanna á eftir að standa sig best? Er klisja að binda þær vonir við nýja framherjann Sesko? Ég held að hann eigi eftir að standa sig vel, að minnsta kosti betur en aðrir sem orðaðir voru við okkur í fjölmiðlum.
4. Hvaða leikmaður mun koma okkur mest á óvart/sýna mestu framfarirnar? Ayden Heaven mun spila sig í að vera í hóp hjá Englandi á HM næsta sumar.
5. Hvaða lið verður enskur meistari? Bæði Liverpool og Arsenal eiga að verða meistarar. Það verður að teljast klúður ef þau vinna ekki deildina. Jafnvel má telja City þar með.
6. Hver verður fyrsti þjálfarinn til að verða rekinn? Daniel Farke hjá Leeds.
7. Hvaða lið kemur mest á óvart? Sunderland mun sleppa við fall
8. Hvaða lið veldur mestum vonbrigðum? Fyrst ætlaði ég að segja Leeds, en miðað við kaupin hjá Chelsea þá stenst það ekki væntingarnar sem fylgja kaupunum og sigrinum á sumarmótinu í Bandaríkjunum.

Embed from Getty Images

Zunderman

1. Hvað væri ásættanlegur árangur í vetur í þínum huga? Evrópusæti, hvort sem er í gegnum deild eða bikarkeppni. Held það skipti félagið máli fjárhagslega.
2. Hvar mun United enda í deildinni? Sjötta sæti.
3. Hver nýju mannanna á eftir að standa sig best? Miðað við undirbúningstímabilið þá kemur Bryan Mbuemo með hraða inn í liðið sem hefur ekki sést lengi, í bland við rétt hlaup og góðan vinstri fót. Sesko þarf fram að áramótum. Vonandi fær hann þá þolinmæði.
4. Hvaða leikmaður mun koma okkur mest á óvart/sýna mestu framfarirnar? Dorgu hefur litið vel út á undirbúningstímabilinu og Heaven gæti orðið fyrsti kostur sem vinstri miðvörður. Ég vona að Mason Mount haldist heill. Ég held að hann gæti haldið Matheus Cunha frá byrjunarliðinu.
5. Hvaða lið verður enskur meistari? Ekkert lið sem ég hef ekki bullandi óþol fyrir.
6. Hver verður fyrsti þjálfarinn til að verða rekinn? Það er sérstakt eins og Brentford gerir að sækja stjóra langt niður í þjálfaraliðið. Það verður annað hvort snilld eða hörmung. Hvað gerist með Nuno Espírito Santo þegar Forest fer að ganga illa. Það er liðið sem fór lengst fram úr öllum xG-gildum í fyrra. Þeir hlutir leita gjarnan jafnvægis.
7. Hvaða lið kemur mest á óvart? Leeds og jafnvel Sunderland eru lið sem mér finnst eiga heima í efstu deild, miðað við stærð og sögu. Tottenham á eftir að rísa, meiðslin í fyrra voru svakaleg en fyrst og fremst hef ég álit á Thomas Frank.
8. Hvaða lið veldur mestum vonbrigðum? Nottingham Forest á eftir að fá jarðtengingu. Er ekki kominn tími á að lið eins og Brentford eða Bournemouth fari aftur niður úr úrvalsdeildinni?

Embed from Getty Images

 

Sigurður Sigurjónsson

1. Hvað væri ásættanlegur árangur í vetur í þínum huga? Í byrjun sumars var tilfinningin 6.-8. sæti. En það hefur komið mér satt best að segja á óvart hversu vel það hefur gengið á leikmannamarkaðnum það sem af er sumri. Ég er því farinn að horfa heldur hærra í töfluna og yrði mjög sáttur við 4.-5. sæti. Fyrst og fremst vill maður bara sjá skemmtilegan fótbolta og fullt af mörkum. Það er aldrei að vita nema það rætist með þessa nýju menn í hópnum
2. Hvar mun United enda í deildinni? Ég ætla að skjóta á 5. sæti.
3. Hver nýju mannanna á eftir að standa sig best? Það er eitthvað sem segir mér að Bryan Mbeumo eigi eftir að skila góðu framlagi í vetur. Lofar virkilega góðu og nú þegar heldur betur búinn að sanna sig í Premier League. Sesko kemur hér einnig sterklega til greina. Það verður áhugavert að sjá hvernig hann kemur inn í þessa deild. Mjög svo spennandi leikmaður.
4. Hvaða leikmaður mun koma okkur mest á óvart/sýna mestu framfarirnar? Það sem ég hef séð af Patrick Dorgu á undirbúningstímabilinu lofar virkilega góðu. Er mjög spenntur að sjá hvernig hann mætir til leiks þegar alvaran hefst. Ég hef mikla trú á því að hann springi út á komandi tímabili og eigi eftir að vera lykilmaður í þessu liði.
5. Hvaða lið verður enskur meistari? Ég ætla að gerast svo djarfur að segja Chelsea
6. Hver verður fyrsti þjálfarinn til að verða rekinn? Ætla að spá því að Leeds verði í brasi og Daniel Farke verði þar af leiðandi fyrstur.
7. Hvaða lið kemur mest á óvart? Það gleður mig að sjá Sunderland að nýju í deild þeirra bestu. Þeir hafa heldur betur styrkt sig í sumar en það skilar sér svo sem ekki alltaf í árangri. Ef þetta smellur saman hjá þeim eru þeir líklegir til að gera gott mót.
8. Hvaða lið veldur mestum vonbrigðum? Þrátt fyrir gott gengi á síðasta tímabili og að hafa tryggt sæti í Meistaradeildinni er eitthvað sem segir mér að þetta gæti orðið smá brekka hjá Newcastle. Þeir hafa verið að missa af þeim leikmönnum sem hafa verið efstir á blaði hjá þeim á leikmannamarkaðnum og öll þessi óvissa í kringum Alexander Isak er ekki til að bæta stöðu mála.

Embed from Getty Images

Friðrik Már Ævarsson

1. Hvað væri ásættanlegur árangur í vetur í þínum huga? Ef við tölum um hvað sé ásættanlegt þá er það lágmarkið sem Amorim þarf að ná til að halda starfinu. Ég held hann sé öruggur gagnvart stjórninni en ef illa gengur í byrjun beinast augun að stjóranum. Við erum búnir að styrka okkur vel fram á við og sumarglugginn gæti orðið betri en menn þorðu að vona. Án Evrópu og með aðeins um einn leik á viku ættum við að standa betur að vígi en mörg liðanna sem enduðu ofar en við í fyrra.
Ég held að Amorim þurfi að ná að lágmarki í efri hluta deildarinnar til að halda starfinu, í mínum huga þarf hann að ná Evrópusæti, sérstaklega ef sterkur miðjumaður og markvörður bætast við. Liðið ætti að fara langt í bikar og deildarbikar en ég krefst ekki bikars.
2. Hvar mun United enda í deildinni? Sjöunda sætinu. Byrjunin verður erfið, samkvæmt einhverjum útreikningum eigum við erfiðustu leikjadagskrána. Ég held að hjólin fari að snúast í rétta átt þegar nýju leikmennirnir aðlagast liðinu og önnur lið fara í Evrópukeppnir.
3. Hver nýju mannanna mun standa sig best? Ég held að hugarfar Bryan Mbeumo valdi því að hann bæti sig áfram, þótt færri vítaspyrnur geri fantasy-spilara fúla. Ég held hann verði allt í öllu og tengi vel saman með Bruno og Sesko.
4. Hvaða leikmaður mun koma okkur mest á óvart/sýna mestu framfarirnar? Þetta val verður á milli bakvarðanna, Patricks Dorgu eða Diego Leon. Leon held ég að fái færri tækifæri í vetur og því ætla ég að skjóta á að Dorgu verði sá sem sýni mestu framfarirnar. Það verður ekki langt liðið af tímabilinu þegar fólk fer að sjá áhrif Amorim á hann því bakverðirnir eru gríðarlega mikilvægir í leikkerfi hans.
5. Hvaða lið verður meistari? Því miður eitthvað annað lið en United. Það þarf ekki eldflaugavísindamann til að átta sig á því að það verður eitt af Arsenal, Liverpool, Man City eða Chelsea. Þessi fjögur verða í sérflokki í ár. Þetta er val á milli fjögurra ömurlegra kosta en ætli það væri ekki minnst sárt ef FC 115 tæki það. Mögulega er það skrifað í skýin ef þetta verður síðasta tímabil Pep Guardiola
6. Hver verður fyrsti þjálfarinn til að verða rekinn? Vanalega eru stjórar nýliðana undir mikilli pressu sérstaklega ef liðin hafa eytt hraustlega í sumarglugganum. Ef svo gengur illa hjá okkur verður enska pressan fljót að kalla eftir höfði Amorim. En ég held að Keith Andrews verði fyrstur til að fara eða kollegi hans Graham Potter hjá West Ham.
7. Hvaða lið kemur mest á óvart? Ég held að Burnley komi til með að koma á óvart. Ekki endilega með því að vinna sig upp töfluna en ég held að þeir verði vel skipulagðir og varnarlega mjög þéttir og reynist liðum erfiðir framan af leiktíðinni og gætu bjargað sér frá falli.
8. Hvaða lið veldur mestum vonbrigðum? Vonandi eitt af stóru liðunum utan við okkur. En nokkur lið koma til greina. Bournemouth missti næsti nær helminginn af byrjunarliðinu, varnarlínuna nær alla með markmanninum. Iraola er snillingur en mun eiga erfitt með þennan sundurtætta hóp sem er eftir.
Leeds spilar áfram gung-ho fótbolta sem flaug í gegnum Championship deildina en flýgur ekki í Úrvalsdeildinni og gætu lent í alvarlegum vandræðum ef þeir ná ekki að stoppa upp í holurnar í varnarleiknum sínum. Burnley á sjálfsagt eftir að skora færri mörk í deildinni en Mbeumo skoraði í fyrra. En mestu vonbrigðin held ég að verði Brentford, því liðinu hefur tekist að halda sér á floti í Úrvalsdeildinni svo árum skiptir en það að missa stjórann, besta leikmanninn, næst besta leikmanninn og fyrirliðann á einu bretti auk þess að fá svo til óreyndan stjóra til að stýra skútunni hljómar eins og uppskrift að hamförum í hæsta gæðaflokki.

Embed from Getty Images

Hvað finnst þér?

Hér eru spurningarnar sem sendar voru á ritstjórnina, þannig þú getir klippt þær og límt með þínum svörum inn í umræðuna í athugasemdum.

1. Hvað væri ásættanlegur árangur í vetur í þínum huga?
2. Hvar mun United enda í deildinni?
3. Hver nýju mannanna á eftir að standa sig best?
4. Hvaða leikmaður mun koma okkur mest á óvart/sýna mestu framfarirnar?
5. Hvaða lið verður enskur meistari?
6. Hver verður fyrsti þjálfarinn til að verða rekinn?
7. Hvaða lið kemur mest á óvart?
8. Hvaða lið veldur mestum vonbrigðum?

 

Æfingarleikur

Nokkrar hugleiðingar eftir undirbúningstímabilið 2025

skrifaði þann | 2 ummæli

Embed from Getty Images

• Sóknarleikurinn er orðinn allt annar. Ekki að það sé teljandi afrek en boltinn gengur hraðar. Mestu munar um Bryan Mbeumo sem er mjög fljótur, sem býr til nýja ógn en líka með góðan vinstri fót og er að negla inn góðum aukaspyrnum og hornspyrnum.
• Varnarleikurinn er ekki enn kominn í lag. Fiorentina fékk gefins mark eftir hornspyrnu og það var líka vandræðagangur gegn Everton þar sem Manuel Ugarte leit sérstaklega illa út.
• Mason Mount er búinn að eiga góðar vikur. Ef hann helst heill og spilar svona þá er til dæmis ekkert sjálfgefið að Matheus Cunha verði fastamaður í liðinu.
• Patrick Dorgu virðist hafa eytt sumarfríinu í ræktinni. Hann hefur styrkt sig verulega og leit vel út í öllum leikjum.
• Verður Ayden Heaven vinstri miðvörðurinn? Hann byrjaði gegn Fiorentina. Luke Shaw var ekki frábær í öðrum leikjum.
• Amad Diallo virðist eiga hægri bakvarðarstöðuna.
• Hvað gera menn eins og Diego Dalot, Matthijs de Ligt og Nassour Mazraoui í lok ágúst ef þeir sjá fram á takmörkuð tækifæri í vetur? Ugarte ef nýr miðjumaður bætist við og Casemiro verður fyrir framan hann? Jafnvel Kobbie Mainoo?
• Með tilkomu Benjamin Sesko virðast tækifæri Rasmus Höjlund búin, miðað við að hann Mount var settur fram gegn Fiorentina og Daninn var geymdur á bekknum síðustu tvo leikina. Hann átti samt ágæta leiki. Joshua Zirkzee hefur ekki sést vegna meiðsla.
• Undanfarin ár hefur alltaf verið spenna í kringum 1-2 unga leikmenn í æfingaferðinni. Það er varla hægt að segja núna. Ekki heimalinga. Diego Leon leit vel út en líklegt virðist að Toby Collyer og Harry Amass verði lánaðir. Bent hefur verið á að met United, með yfir 4.700 leiki í röð með uppalinn leikmann í hóp á leikdegi, sé í hættu.
• Vonandi fer ekki allt í skrúfuna þegar tímabilið byrjar. Við höfum áður verið mötuð á almannatengslaklisjum síðsumars um að þjálfarinn sé sáttur við hópinn, hvað allir séu í miklu betra standi en áður, hvað mórallinn í hópnum sé góður í æfingaferðinni til þess eins að horfa á allt fara í skrúfuna gegn Brighton í fyrsta eða öðrum leik. Á þeim miklu hreyfingum sem verið hafa á liðinu er ljóst að það er enn í mótun. Bruno hefur til dæmis verið oftast sóknartengilliður en miðað við innkaupin virðist augljóst að hann eigi að vera aftar.

Enska úrvalsdeildin

Það besta (illskásta) frá 2024-5.

skrifaði þann | Engin ummæli

Embed from Getty Images

Réttast að gleyma eða loksins komin næg fjarlægð til að rifja upp? Síðastliðið tímabil hjá Manchester United var, miðað við endanlegt sæti í deild, það versta í hálfa öld. Rauðu djöflarnir hafa undanfarnar vikur sleikt sárin og eru að rísa upp við byrjun nýs tímabils. En fyrst þurfti ritstjórnin að gera upp það versta – og það skásta – frá síðustu leiktíð.

Embed from Getty Images

Hrólfur Eyjólfsson:

Besti leikmaður tímabilsins (sem ekki er Bruno)? Amad er sennilega sá eini sem kemur til greina fyrir utan Bruno. Ég er ekki viss um hver er besta staðan hans en honum verður sennilega spilað þegar hægt er.
Fallegasta markið? Sigurmark Amad gegn City – en það er ekki úr mörgum að velja.
Augnablik tímabilsins? Tvöfaldi klobbinn hjá Zirkzee á Saliba í bikarnum á Emirates.
Besti leikur? 7-0 sigurinn á Barnsley gaf mér vonina um að þetta væri á leið í rétta átt
Versti leikur? Of margir lélegir leikir á þessu tímabili. Ég hallast annað hvort að tapinu gegn West Ham, sem varð til þess að ten Hag var rekinn, eða gegn Wolves á annan í jólum.
Stjóri ársins? Marc Skinner, þjálfari kvennaliðsins. Kom þeim í Meistaradeildina og annan bikarúrslitaleikinn í röð.
Þinn dómur um tímabilið? Þetta var erfitt og pirrandi tímabil, en það gerist þegar tvisvar er ráðist í umbyltingar á leikmannahópi og leikstíl á einu tímabili. Vonandi er eina leiðin upp á við eftir þessa skelfingu en það þarf þolinmæði til að byggja þetta lið nánast frá grunni.

Embed from Getty Images

Björn Friðgeir Björnsson

Besti leikmaður tímabilsins (sem ekki er Bruno)? Noussair Mazraoui
Fallegasta markið? Amad gegn City.
Augnablik tímabilsins? Sigurinn á Lyon.
Besti leikur? Sigurinn á Lyon.
Versti leikur? Tapið fyrir Tottenham í úrslitum Evrópudeildarinnar.
Stjóri ársins? Hjá okkur??
Þinn dómur um tímabilið? Það er nauðsynlegt að gleyma því sem fyrst og horfa fram á veginn. Þetta bara gerðist ekki. Allar líkur eru á að við náum í það minnsta að skora meira næsta vetur og ef það gerist þá verður þetta skárra. En það er hollt og gott að fá áminningu um að árangur er ekki sjálfgefinn. Kannski læra nógu margir í klúbbnum af því.

Embed from Getty Images

 

Zunderman

Besti leikmaður tímabilsins (sem ekki er Bruno)? Noussair Mazraoui. Kannski því hann fór fram úr væntingum, hann var alltaf meiddur hjá Bayern og kom þess vegna ódýrt. En síðan var þetta traustur og vel spilandi varnarmaður.
Vil líka nefna Diego Dalot. Alltaf til taks og spilaði miklu meira en eðlilegt hefði getað talist, sem trúlega kom aðeins niður á hans leik.

Fallegasta markið? Kobbie Mainoo gegn Lyon. Snyrtilegt spil og yfirvegað skot. Eftir þetta vonaði ég að hann yrði framherji út tímabilið, meðal annars í þeirri trú að liðið myndi halda boltanum betur.

Augnablik tímabilsins? Skallinn hjá Harry. Jafnvel 2-4 undir trúði ég. Eftir að Kobbie skoraði var ég orðinn sigurviss.

Besti leikur? Lyon leikurinn er leikurinn sem munað verður eftir því hann vannst. Leikirnir gegn Bilbao voru traustir því andstæðingurinn var góður. 4-0 sigurinn gegn Everton var leikurinn þar sem allt gekk upp.

Versti leikur? Tapið gegn Tottenham, dauf frammistaða gegn ómerkilegum mótherja. Spurs hafði í vor þorið til að gera það sem við gerðum ekki í fyrra, að reka þjálfara þrátt fyrir bikar.
Wolves um jólin. Það voru einhverjar vonir um að liðið myndi rétta við undir nýjum þjálfara gegn liði í fallbaráttunni en svo var bara enginn heima og Bruno rekinn út af.
Heimaleikurinn gegn Tottenham. Tímabilið átti að vera nýtt upphaf, en svo var bara hlaupið í gegnum vörnina hjá okkur, meira að segja áður en Bruno var rekinn út af.

Stjóri ársins? Ruud van Nistelrooy. Eini sem náði því mesta út úr mannskapnum og miðaði alla sína vinnu við það.

Þinn dómur um tímabilið? Ég var á þeirri skoðun að undirliggjandi tölfræði í deildinni þýddi að reka ætti Erik ten Hag, þrátt fyrir bikarsigur. Ég óttaðist að um leið og leikur tapaðist yrði aftur byrjað að tala um að hann ætti að fara. Því miður var það rétt. Það versta var að hann fékk sumarið og leikmenn voru keyptir inn miðað við hans leikstíl. Síðan kemur Ruben með annan leikstíl og þarf öðruvísi leikmenn. Þetta eru dýr mistök í tímum og peningum.
Þess vegna trúði ég að rétt væri að ráða pragmatískan stjóra eins og Thomas Frank, sem ár eftir ár hefur náð miklu meira út úr liðinu en laun leikmanna segja til um. Ruben er hins vegar ákveðinn hugsjónamaður en það vantaði mikið upp á hópinn fyrir hann. Vonandi hef ég rangt fyrir mér.

Embed from Getty Images

Magnús Þór Magnússon

Besti leikmaður tímabilsins (sem ekki er Bruno)? Það er erfitt að nefna ekki Amad Diallo sem næstbesta leikmann tímabilsins. Á þessu tímabili vonbrigða og lágra dala voru ekki margir sem litu vel út. Amad stóð allt fyrir sínu og var öflugur hvort sem hann spilaði sem vængbakvörður eða sóknartengill. Hlakka mikið til að sjá hvað hann gerir næsta tímabil.

Fallegasta markið? Samspil Lisandro og Martínez og Amad gegn City var frábært. Hnitmiðuð sending Licha yfir varnarlínu City og stórkostleg móttaka Amad og svellköld afgreiðsla í kjölfarið. Skemmir heldur ekki fyrir að gera þetta gegn erkifjendunum.
Þrumufleygur Casemiro gegn Leicester fær svokallað „honorable mention.“

Augnablik tímabilsins? Ég hreinlega get ekki nefnt annað en sigurmark Harry Maguire gegn Lyon. Þvílík dramatík og gleði sem hefur vantað í langan tíma hjá Manchester United. Evrópukvöldin á Old Trafford hafa oft mikinn sjarma og það er grátlegt að sitja hjá næsta tímabil.

Besti leikur? Frammistöðulega var það klárlega seinni leikurinn gegn Athletic Club. Það var einhver töfraára yfir liðinu í þeim leik og nánast allir áttu góðan leik. Minnisstæðust var frammistaða Mason Mount, sérstaklega seinna mark hans í leiknum. En því náði United ekki að fylgja þessu eftir eins og svo oft á tímabilinu.
Dramatískasti leikurinn var seinni leikurinn gegn Lyon. United virtust ætla að sigla þessu í höfn með 2:0 sigri en tossaskapur liðsins hjálpaði gestunum að komast í framlengingu. Og það hætti ekki þar en Lyon tókst að komast í 2:4 forystu gegn ótrúlega vanvirku United liði. En á einhvern ótrúlegan hátt tókst United að snúa taflinu við í uppbótartíma og vinna 5:4 sigur.

Embed from Getty Images

Versti leikur? Hversu sorglegt er það að þessi flokkur býður upp á flestu möguleikana? Það væri hægt að nefna slæm töp í deildinni en þar var af nógu að taka. Frammistaðan í deildarbikarnum og enska bikarnum var heldur ekki uppá marga fiska. En það er einn sem er verstur og á afdrifaríkasta hátt.
Úrslitaleikurinn gegn Tottenham í Evrópudeildinni hlýtur að vera verstur. Tapið þýddi að United kæmist ekki í Meistaradeild Evrópu eða neina aðra Evrópukeppni. Fjárhagslegt tjónið á eftir að koma betur í ljós, það er að segja áhrifin sem það mun hafa á félagaskiptagluggann og næsta tímabilið í heild. Að tapa gegn þessu lélega Tottenham liði í einum leiðinlegasta leik tímabilsins var ófyrirgefanlegt.

Stjóri ársins? Tímabilið hófst hjá ten Hag eftir bikarsigurinn í fyrravor, hann fékk að eyða töluverðum fjármunum í að styrkja liðið en bikarsigurinn var frávik og honum var sparkað í október. Líklega hefði hann átt að fjúka fyrr.
Ruud van Nistelrooy kom heim sem aðstoðarmaður ten Hag í fyrra sumar. Hann varð síðan staðgengill og liðið sýndi ágæta takta hjá honum.
Rúben Amorim er þá þriðji kandídatinn. Hann hefur þótt einn mest spennandi ungi þjálfari Evrópu og Sporting liðið hans var bæði það besta í Portúgal og skemmtilegt að horfa á. En hann vill spila 3-4-2-1 og er ekki sveigjanlegur með það. Hann var aldrei með rétta mannskapinn í það og allur tíminn fór í að venja menn við kerfið. Það er erfitt að dæma hann á tímabilinu, bæði því hann hafði aldrei sitt sterkasta lið og framherjarnir voru hörmung. Ég vel hann því ég held að í honum búi eitthvað sem ég hef ekki séð hjá stjóra United lengi.

Embed from Getty Images


Þinn dómur um tímabilið? Tímabilinu á undan lauk með bikarsigri en skammarlegri stöðu í deildinni. Ratcliffe og félagar tóku sér langan tíma í að veita ten Hag áfram traustið.
Liðið átti svo margar lélegar frammistöður á tímabilinu og það er erfitt að nefna einstaka leiki því það var nánast ekkert sem var að ganga. Markaskorunin var bara ekki til. Vesalings Rasmus Höjlund veldur því engan vegin að skora né Joshua Zirkzee þótt sá síðarnefndi geti spilað fótbolta. Marcus Rashford og Antony voru lánaðir út en bara sá síðarnefndi stóð sig en hann smellpassaði í Real Betis liðið.
Bikarkeppnirnar voru vonbrigði og leiðinlegt að komast ekki í stöðu til að verja titilinn og tryggja einhverskonar þátttöku í Evrópu.
Ljósasti punkturinn var þá þátttakan í Evrópudeildinni og fram að úrslitaleiknum var United eina liðið sem ekki hafði tapað leik. En það kom svo gegn Tottenham í drepleiðinlegum leik. Enn og aftur var markaskorunin vandamál og klárlega mistök þjálfarans að gera ekki breytingar töluvert fyrr í leiknum.
Heilt yfir fær tímabilið falleinkunn og gífurlega mikilvægur sumargluggi framundan þar sem ekki þarf bara að kaupa rétt heldur einnig að selja rétt.

Eitthvað annað sem þú vilt koma á framfæri í þessari samtalsmeðferð? Það er búið að rita margt neikvætt um Manchester United bæði á síðasta tímabili og vikurnar á eftir. Það gefur samt jákvæð fyrirheit að sjá leikmennina sem United er að sækja. Matheus Cunha var kláraður mjög snemma og mun klárlega bæta liðið og smellpassa í þetta tveggja sóknartengla kerfi Amorim. Bryan Mbeumo frá Brentford hefur verið stöðugt besti leikmaður Lundúnafélagsins en hann getur spilað á hægri kanti og einnig sem hægri sóknartengill. Vissulega vantar framherja og minnst tvo miðjumenn. Mikið er talað um markverði en það ætti ekki að vera forgangsstaða í þessum glugga þó svo að vissulega sé Onana varla líklegur til að vera framtíðarmarkvörður Manchester United. Við bíðum enn.

 

Æfingarleikur

Steindautt markalaust jafntefli í fyrsta æfingaleiknum 2025

skrifaði þann | Engin ummæli

Embed from Getty Images

Manchester United gerði 0-0 jafntefli við Leeds í hrútleiðinlegum leik sem var fyrsti æfingaleikurinn sumarið 2025. Spilað var í Stokkhólmi. Þetta voru helstu punktarnir úr leiknum.

• Diego Leon byrjaði sem vinstri bakvörður og Amad sem sá hægri. Obi var frammi.
• Leeds fékk fyrsta færið á þriðju mínútu þegar pláss losnaði á bakvið Leon. Leeds náði góðri fyrirgjöf en ekki skoti.
• United var meira með boltann en gerði lítið fyrir hann fyrr en eftir vatnspásuna á 24. mínútu.
• Í vatnspásunni sýndu myndavélarnar Will Farrell sem á orðið hlut í Leeds. Hann sýndi stoltur bol sem merktur var Gnesta, litlum bæ við Stokkhólm. Væntanlega hafa Google-leitir að því svæði margfaldast.
• Fyrsta færi United var á 40. mínútu. Obi snéri sér og tók eiginlega skotfæri af Matheus Cunha. Skot Obi fór rétt framhjá.
• Cunha sýndi það sem ætlast er til af honum, tók boltann, stakk sér á milli manna og reyndi að komast áfram. Diego Leon lítur út fyrir að vera mun eldri en 18 ára og átti ágætan hálfleik.

• Með innkomu Harry Maguire og Leny Yoru í hálfleik fylgdu langar skiptingar
• Leeds fékk færi á 56. mínútu þegar vörn United opnaðist eftir að Dorgu datt en Heaton varði vel.
• Annað Leeds færi á 64. mínútu, eftir spil í gegnum vörn United hægra megin, en Heaton ver vel.
• Dorgu átti trúlega að fá víti á 81. mínútu, fékk ekki en stóð upp aftur og átti gott skot.
• Langbesta færi United kom á 88. mínútu. Mainoo skallaði í slána, Dalot fylgdi fyrst eftir og svo féll boltinn fyrir Heaven sem hefði átt að skora en markvörður Leeds varði.
• Dorgu og Mount bestir fram á við fyrir United í seinni hálfleik. Yoro fínn, Heaton varði vel í að minnsta kosti þrjú skipti.
• Hinn 17 ára gamli Bendito Mantato byrjaði seinni hálfleikinn og fékk 35 mínútur. Jack Fletcher kláraði leikinn.

• Rétt fyrir leikinn spurðist út að United væri nánast búið að gera samning við Barcelona um Marcus Rashford. Hann fer að láni í ár og Barcelona hefur síðan kost á að kaupa.
• Á meðan leik stóð komu fréttir um að Bryan Mbuemo hefði heimsótt Old Trafford í dag og myndi mæta á Carrington eftir helgi.
• Ronny Johnsen var sérfræðingur hjá MUTV. Lítur vel út. Talaði um að mikilvægast væru að leikmenn næðu að tengjast.

• Amorim lýsti ánægju með Cunha, hann hefði verið viljugur að keyra á mótherjana. Sagði Leeds hafa leyst það vel og haldið boltanum þegar United reyndi að pressa. Kvartaði yfir að hraða vantaði í miðjuna. Á móti sagði hann að stemmingin væri góð í hópnum. Sagði augljóst að þetta hefði verið æfingaleikur.

 

Enska úrvalsdeildin

Ratcliffe, Wilcox og Berrada sagðir plotta í veiði á Vopnafirði

skrifaði þann | 1 ummæli

Embed from Getty Images

Æðstu stjórnendur enska knattspyrnufélagsins Manchester United eru sagðir hafa dvalið í vikunni á Vopnafirði og notað tímann til að ræða framtíðaráform félagsins. Þeir eru þar í boði Jims Ratcliffe sem undanfarin áratug hefur safnað jörðum í kringum laxveiðiár á svæðinu.

Frá þessu er greint í íþróttamiðlinum The Athletic. Þar segir að Omar Berrada, framkvæmdastjóri og Jason Wilcox, yfirmaður íþróttamála, hafi komið til Vopnafjarðar og dvalið með Ratcliffe, sem fer með ráðandi hlut í félaginu.

The Athletic tekur fram að þjálfaranum, Ruben Amorim, hafi verið boðið með en niðurstaðan orðið sú að mikilvægast væri að hann einbeitti sér að æfingum í Manchester. Sagt er að Ratcliffe hafi löngum komið sér upp þeirri venju að funda með stjórnendum sínum hingað og þangað um heiminn því honum þyki að mörgu leyti betra að komast að kjarnanum í viðskiptatengdum umræðum í afslappandi umhverfi heldur en á skrifstofunni.

Aðaltilgangurinn að ræða framtíð United

Ratcliffe er sagður vilja hafa lykilfólk á sama stað í eigin persónu þegar teknar eru stórar ákvarðanir, í þessu tilfelli um leikmannakaup. Þótt fjarskiptasamband sé víða takmarkað við árnar tókst hópnum í gær að ganga frá tilboði upp á 70 milljónir punda í framherjann Bryan Mbeumo, sem United hefur verið á höttunum eftir í sumar.

Í frásögninni kemur fram að þrímenningarnir hafi fundað reglulega síðustu daga en þess á milli hafi í það minnsta einhverjir úr hópnum veitt í ám Ratcliffe. Miðillinn segir að aðaltilgangur ferðarinnar hafi þó verið að eiga innihaldsrík samtöl um United, bæði fjármálastöðu félagsins og fótboltann sjálfan.

Þrímenningarnir hafa eflaust haft um nóg að tala þar sem síðasta leiktíð hjá United var sú versta í yfir 50 ár því liðið endaði í 15. sæti ensku úrvalsdeildarinnar. Leikmannaviðskipti félagsins hafa gengið treglega það sem af er sumri.

Árleg loftbrú Ratcliffe

The Athletic segir að stjórnendurnir fari frá Vopnafirði áfram til Svíþjóðar þar sem United spilar fyrsta æfingaleikinn fyrir komandi keppnistímabil á morgun. Sem fyrri ár um þetta leyti hafa einkaþotur frá fyrirtæki Ratcliffe, Ineos, nánast haldið uppi loftbrú milli flugvallarins á Egilsstöðum og Englands.

Tvær þeirra fara frá Egilsstöðum í dag, önnur til Nice í Frakklandi en hin til vallar á sunnanverðu Englandi. Þeir vellir eru í nágrenni við bækistöðvar Ratcliffe og starfsemi hans.

Síðasta haust greindi Austurfrétt fyrst fréttamiðla frá því að Ratcliffe hefði í júlí í fyrra boðið meðeigendum sínum í United, Glazer-fjölskyldunni, í veiði, samveru og samtals í Vopnafirði. Austurfrétt var einnig fyrsti miðillinn sem á sínum tíma greindi frá því að Ratcliffe hefði keypt jarðir við laxveiðiár í Vopnafirði.