Chelsea fara í undanúrslitaleikinn þar sem þeir mæta Tottenham. Svekkjandi leikur í kvöld þar sem Michael Oliver dómari var í aðalhlutverki. Ander Herrera fékk eitt ósanngjarnasta rauða spjald leiktíðarinnar vegna þess að Oliver var búinn að skipa sig sérstakan verjanda Eden Hazard sem gerði tilkall til Edduverðlauna í fyrri hálfleiknum.
Embed from Getty Images
Það er ekki hægt að segja að liðið hafi verið að leika eitthvað sérstaklega illa í þessum leik. Miðað byrjunarliðið átti United að verjast á mörgum mönnum og sækja svo hratt með Henrikh Mkhitaryan og Marcus Rashford. Liðið byrjaði leikinn frekar vel og pressuðu Chelsea stíft framarlega á vellinum með ágætum árangri. Það tók Chelsea alveg 15-20 mínútur að byrja þennan leik en þegar það gerðist varð Eden Hazard mjög áberandi á vellinum. Á fimmtán mínútna kafla fiskaði hann Herrera af velli með leikrænum tilburðum þegar þeir mættust á vellinum. Rauða spjaldið drap okkar menn töluvert niður og ekki hjálpaði Fellaini > Mkhitaryan skipting til. En staðan var þrátt fyrir allt 0:0 í hálfleik.